پولیس اور عوام کے درمیان بہتر تال میل کو بنائے رکھنے اور عوامی مسائل کو متعلقہ حکام تک پہنچانے کے لیے جمعرات کو جموں و کشمیر پولیس نے ضلع پلوامہ میں ترال علاقے کے دور افتادہ گاوں آری پل پولیس چوکی میں ایک عوامی دربار منعقد کیا۔
پولیس پبلک میٹنگ میں ایس ایس پی اونتی پورہ طاہر سلیم اور پولیس کے دیگر اعلیٰ افسران کے علاوہ مقامی ائمہ مساجد، اوقاف ممبران، نمبرداروں اور چوکیداروں کی ایک بڑی تعداد نے شمولیت کی۔
پولیس پبلک میٹنگ کے دوران عوام کی جانب سے کئی معاملات اجاگر کیے گئے جن کو پولیس افسران نے غور سے سننے کے بعد متعلق حکام تک پہنچانے اور مسائل کو حل کرنے کی یقین دہانی کرائی۔
اس موقع پر میڈیا سے گفتگو کرتے ہوئے ایس ایس پی اونتی پورہ نے بتایا کہ ’’پولیس عوام کے ساتھ ہر محاذ پر شانہ بشانہ کھڑی ہے اور اس میٹنگ کا انعقاد اسی لیے کیا گیا تھا تاکہ عوام اور پولیس کے روابط اور تعلقات کو مزید تقویت پہنچے۔‘‘
