پلوامہ پولیس نے ڈسٹرکٹ پولیس لائنز میں ہلاک شدہ پولیس اہلکاروں کی یاد میں ایک پینٹنگ مقابلے کا انعقاد کیا جس میں ضلع پلوامہ کے سرکاری و نجی اسکولوں میں زیر تعلیم درجنوں طلبہ نے حصہ لیا۔
پینٹنگ مقابلے میں شرکت کرنے والے طلباء و طالبات کو عمر کے حساب سے دو گروپس میں تقسیم کیا گیا تھا۔ جس میں سینیئر زمرہ میں سید جویریہ نے پہلی جب کہ سیم کنور نے دوسرے پوزیشن حاصل کی۔ وہیں جونیئر زمرے میں سحرش علی نے پہلی جب کہ رابعہ قیوم نے دوسری پوزيشن حاصل کی۔
اس موقع پر ڈی ایس پی پلوامہ نے پینٹنگ مقابلے میں شرکت کرنے والے طلبہ خصوصاً پوزیشن حاصل کرنے والوں کی کوششوں کو سراہا۔
مزید پڑھیں: ترال: شبانہ آتشزدگی میں رہائشی مکان خاکستر
انہوں نے ضلع کے نوجوانوں خصوصاً ابھرتے فنکاروں کو اپنے فن اور تخلیقی ذہن کو ایک مخصوص سمیت دیتے ہوئے اس کے ذریعے اپنا مستقبل سنوارنے پر زور دیا۔
تقریب کے اختتام پر مقابلے میں امتیازی پوزیشن حاصل کرنے والے طلبہ کو اعزازات سے نوازا گیا۔
تقسیم انعامات کی تقریب کی صدارت ڈی وائی ایس پی پلوامہ قاضی شمس نے کی جب کہ مختلف اسکولوں سے تعلق رکھنے والے اساتذہ کرام بھی موجود تھے۔
