جموں و کشمیر کے ضلع پلوامہ کے اونتی پورہ میں لاک ڈاؤن کی خلاف ورزی کرنے پر پولیس نے آج 34 گاڑیوں کو ضبط کیا ہے۔
اس ضمن میں ای ٹی وی بھارت کو معلوم ہوا ہے کہ جنوبی کشمیر کے اونتی پورہ پولیس ڈسٹرکٹ کے تحت آنے والے علاقوں میں لاک ڈاؤن کو موثر بنانے کے لیے جہاں سیول اور پولیس انتظامیہ نے عوام سے بار بار لاک ڈاؤن کی پاسداری کرنے کی اپیل کی ہے۔ تاہم کئی عناصر ان اپیلوں کو مسترد کر رہے ہیں۔ اس لیے اب پولیس نے خلاف ورزی کرنے والوں کے خلاف اپنا شکنجہ کسنا شروع کر دیا ہے اور آج اسی مہم کے تحت 34 گاڑیوں کو ضبط کر کے چالان کیا گیا ہے۔ یہ گاڑیاں لاک ڈاؤن کے باوجود چل رہی تھیں۔
اس دوران پولیس نے یہ دعوی بھی کیا ہے کہ 35 ایسے افراد سے 17500 روپے جرمانہ بھی وصول کیا گیا ہے جو بغیر ماسک کے گھوم رہے تھے۔ پولیس نے ترال، اونتی پورہ، پامپور اور کھریو کے عوام سے لاک ڈاؤن کی پاسداری کرنے کی اپیل دہرائی ہے۔
