وادی کشمیر میں کئی غیر سرکاری و سیاسی تنظیمیں لوگوں کی فلاح و بہبود کے لیے برسوں سے کام کرتی آئی ہیں۔ یہ تنظیمیں لوگوں کی مدد کے لیے ہر وقت تیار رہتی ہیں۔ کسی بھی صورت میں انتظامیہ کے ساتھ شانہ بشانہ کام کرنے کے لیے تیار رہتی ہیں، اگرچہ ان غیر سرکاری و سیاسی تنظیموں کو انتظامیہ سے کوئی بھی مدد نہیں ملتی ہے، تاہم کچھ زندہ دل لوگ ان تنظیموں کو مدد کرتے ہیں جس سے یہ تنظیمیں مستحق افراد تک مدد پہنچاتی ہیں۔
ان ہی غیر سرکاری رضاکارانہ تنظیموں میں انصار المساکین بھی قابل ذکر ہے جو ہر مشکل میں لوگوں کی راحت رسانی کے لیے پیش پیش رہتے ہیں جہاں اس غیر سرکاری تنظیم نے لوگوں کے لیے پہلے ہی بہت کام انجام دیے ہیں۔ وہیں، کورونا واٸرس جیسی مہلک بیماری کے پھیلنے کے بعد اس تنظیم نے دن رات لوگوں کی خدمت انجام دینے میں کوئی بھی کسر باقی نہیں چھوڑی ہے۔
مزکورہ تنظیم نے وادی کے مختلف اضلاع میں جہاں قرنطینہ مراکز بنائے گئے ہیں وہاں پر اس نے کافی مدد کی ہے۔ وہیں اس تنظیم نے ضرورت مندوں تک راشن و دیگر سازوسامان پہنچانے میں اہم رول ادا کیا ہے۔
اس تنظیم نے اس کے علاوہ کورونا وائرس وبا کے دوران ادویات سے بھرے ہوئے ہزاروں کٹس اور ماسک بھی لوگوں میں بلا کسی معاوضے کے تقسیم کی ہے۔ اگر دیکھا جائے تو اس غیر سرکاری تنظیم نے کورونا میں لوگوں کی بھلائی کے لیے ہر سطح پر قابل ستائش کام کیا ہے۔
