جموں و کشمیر کے سب ضلع ترال میں سومو ڈرائیوروں کی جانب سے طے شدہ کرایہ سے زیادہ کرایہ وصول کرنے کی خبروں کے بعد آج انتظامیہ نے سومو یونین کے ذمہ داروں کے ساتھ میٹنگ منعقد کی۔
جس میں سب ڈویژنل پولیس آفیسر ترال (ایس ڈی پی او) ڈاکٹر اعجاز ملک نے یونین کے ذمہ داروں سے کرایہ کے متعلق تبادلہ خیال کیا، انھوں نے سومو یونین کے ذمہ داروں کو بتایا کہ روزآنہ عوامی حلقوں کی طرف سے اضافی کرایہ وصول کرنے کی شکایات موصول ہو رہی ہے، اس لیے ڈرائیوروں کو طے شدہ کرایہ وصول کرنے سے باز آنا چاہیے۔
میٹنگ کے بعد صحافیوں سے بات کرتے ہوئے ایس ڈی پی او ترال ڈاکٹر اعجاز ملک نے بتایا کہ آج کی میٹنگ کے دوران سومو یونین کے عہدیداروں پر زور دیا کہ وہ آر ٹی او کشمیر کی طرف سے جاری کردہ کرایہ کے ہی مطابق کرایہ وصول کریں اور اگر کسی نے اضافی کرایہ وصول کیا تو ان کے خلاف ضابطے کے تحت کاروائی کی جائے، اس کے علاوہ ڈرائیوروں کو یہ ہدایت بھی دی گئی کہ وہ اپنی گاڑیوں کے دونوں طرف کرایہ کی لسٹ چسپاں کریں تاکہ مسافروں کو کوئی پریشانی نا ہو۔
