اسپتال کی عمارت تو بن گئی علاج و معالجہ شروع نہیں ہوا

جنوبی کشمیر کے سب ڈسٹرکٹ ترال میں واقع بٹ نور گاؤں کو مرکزی حیثیت حاصل ہے، یہ گاؤں تحصیل صدر مقام سے آٹھ کلومیٹر کی دوری پر واقع ہے تاہم اس مقام پر محکمہ صحت کی غیر تسلی بخش سہولیات عوام کے لیے سوہان روح بنی ہوئی ہے۔

مقامی لوگوں کے مطابق مرکزی حیثیت حاصل ہونے کی وجہ سے یہاں ڈسپنسری تو ہے لیکن بڑی آبادی والے علاقے میں سہولیات کا فقدان ہے۔

تاہم آج سے پانچ سال قبل علاقے میں ایک نئی اسپتال کی عمارت NTPHC یعنی نیو ٹائپ پبلک ہیلتھ سنٹر کی تعمیر کام کی گئی جس کے بعد یہاں کے لوگوں نے راحت کی سانس لی۔ تاہم عمارت تو بن گئی مگر اسپتال نہیں بنا۔ یہاں بلڈنگ تو تیار ہے مگر محکمہ صحت کو وقف نہیں کی جا رہی ہے جس کی وجہ وسیع آبادی کے لوگوں کو گوناگوں مشکلات کا سامنا کرنا پڑ رہا ہے۔

علاقے میں گجر بکروال طبقے سے وابسطہ لوگ بھی رہائش پذیر ہیں، تاہم وہ بھی محکمۂ صحت کی طرف سے فراہم کردہ غیر تسلی بخش سہولیات کا رونا رو رہے ہیں۔

مقامی لوگوں نے ای ٹی وی بھارت کو بتایا کہ انتظامیہ نامعلوم وجوہات کی بنا پر نئے اسپتال کا آغاز نہیں کر رہی ہے۔

انہوں نے گورنر انتظامیہ سے مطالبہ کیا ہے کہ بٹ نور میں قائم اس نئے اسپتال کو عوام کو وقف کیا جائے۔

انتظامیہ کے ایک اعلی عہدیدار نے ای ٹی وی بھارت کو فون پر بتایا کہ نئی عمارت کا اپریل میں افتتاح کرنے کا منصوبہ تھا، تاہم کورونا وائرس کے سبب اسے موخر کیا سکتا ہے۔