جموں و کشمیر ضلع پلوامہ کے علاقہ ترال میں چھاپڑی فروشوں کی جانب سے ترال مارکیٹ کی اہم سڑکوں کے کنارے ناجائز قبضہ کرنے والوں کے خلاف انتظامیہ نے مہم چلائی، جس میں متعدد چھاپڑی فروشوں کے ریڑیوں کو سڑک کے کنارے سے ہٹایا گیا، اس کے علاوہ سڑکوں کے کنارے غلط طریقوں سے پارک کی گئی گاڑیوں کے ٹائروں سے ہوا بھی نکالی گئی۔
مہم کی قیادت ایڈیشنل ڈپٹی کمشنر ترال شبیر احمد رینا از خود کر رہے تھے اس کے علاوہ میونسپل کمیٹی ترال کے ایگزیکیٹیو آفیسر منظور احمد بھی اپنے ماتحت عملے کے ساتھ مہم میں شامل تھے۔
لوگوں نے انتظامیہ کے اس اقدام کی سراہنا کرتے ہوئے کہا ہے کہ ایسے اقدامات سے راہگیروں کے ساتھ ساتھ مریضوں کو بھی وقت پر ہسپتال تک پہنچنے میں آسانیاں بھی پیدا ہونگی، کیونکہ سڑکوں کے کنارے غیر قانونی طور پر قبضہ کرکے ریڑی لگانے والوں کی وجہ سے مارکیٹ میں ٹریفک کا بھی مسئلہ پیدا ہوتا ہے، اور جو راستہ پانچ منٹ کا ہوتا ہے وہ ٹریفک کی وجہ سے ایک گھنٹے میں طئے ہوتا ہے۔
ایڈیشنل ڈپٹی کمشنر ترال شبیر احمد رینا نے بتایا کہ عوام کی سہولیات کے لیے انتظامیہ وعدہ بند ہے اور اس طرح کی کاروائی مستقبل میں بھی جاری رہے گی۔
