وادی کے دوسرے اضلاع کی طرح سب ضلع ترال میں بھی کورونا وائرس کے کیسز کی تعداد میں اضافہ ہورہا ہے۔ آج سرینگر کے ایک اسپتال میں بیس سالہ دوشیزہ کی موت ہونے سے سب ضلع میں کورونا سے مرنے والوں کی تعداد تین ہوگئی ہے۔ وہیں، سب ضلع میں دو سو سے زائد افراد کی رپورٹ مثبت آنے کے بعد ان تمام لوگوں کو ہوم آیسولیشن میں رکھا گیا ہے۔
ایڈیشنل ڈپٹی کمشنر ترال شبیر احمد رینہ
کووڈ کے بڑھتے کیسز کے بعد ایڈیشنل ڈپٹی کمشنر ترال شبیر احمد رینہ نے علاقے کے نمبرداروں اور چوکیداروں کے ساتھ میٹنگ کر کے ان کو ہدایت دی کہ اپنے اپنے دیہات میں لوگوں کو اس بیماری کی تباہ کاریوں سے آگاہ کریں۔
ایڈیشنل ڈپٹی کمشنر ترال شبیر احمد رینہ نے بتایا کہ انتظامیہ کسی بھی طرح کے صورتحال کا مقابلہ کرنے کے لیے تیار ہیں اور فی الوقت دو کووڈ سینٹر بھی تیار رکھے گئے ہیں تاکہ ضرورت پڑنے پر ان کو استعمال میں لایا جا سکے۔
