جموں و کشمیر کے ضلع پونچھ میں ضلع ترقیاتی کونسل انتخابات کے پیش نظر انتخابی مہم سے واپس لوٹ رہے جے کے پی ایم پارٹی کے ڈی ڈی سی امیدوار ردھم پریت سنگھ پر چند موٹر سائیکل پر سوار نامعلوم نقاب پوش افراد نے جان لیوا حملہ کردیا۔
نقاب پوشوں کے اچانک حملے سے ردھم پریت سنگھ اور انکے ساتھی بچ تو گئے لیکن انکی گاڑی کو کافی زیادہ نقصان پہنچایا، گاڑی کے تمام شیشے کو توڑ دیا گیا۔
ردھم پریت سنگھ نے بتایا کہ ’’ہم ڈی ڈی سی انتخابات کی انتخابی تشہیر کرکے واپس گھر لوٹ رہے تھے کہ اچانک ہی کچھ نقاب پوشوں نے گاڑی پر لوہے کی راڈ کے ساتھ ہم پر جان لیوا حملہ کردیا، جس میں گاڑی کے شیشے ٹوٹ گئے۔ اس دوران کسی بھی طرح سے ہم اپنی جان بچا کر وہاں سے نکلنے میں کامیاب ہوئے۔ لیکن ابھی تک ان نقاب پوشوں کی پہچان نہیں ہو سکی ہے۔
ردھم پریت سنگھ کے مطابق انکی کسی بھی شخص سے کوئی ذاتی دشمنی نہیں ہے اور نہ ہی آج تک کسی سے بھی ان کا تنازعہ ہوا ہے، لیکن انھوں نے اس حملے کو سیاسی حملہ ضرور قرار دیا۔
