چند روز قبل سرحدی ضلع پونچھ میں ایک خاتون کی لاش برآمد ہونے کے بعد پولیس نے تحقیقات شروع کردی تھی۔ تفتیش کے چند دن بعد ہی پولیس نے فوت ہوئی خاتون کے شوہر کو اپنی زوجہ کے قتل کے الزام میں گرفتار کرلیا۔
فوت ہونے والی 36 سالہ خاتون پیشے سے ٹیچر تھی، جب کہ اس کے قتل کے الزام گرفتار کیا گیا اس کا شوہر جموں و کشمیر پولیس میں تعینات ہے۔
پولیس ذرائع کے مطابق تفتیش کے دوران یہ بات سامنے آئی ہے کہ مقتولہ (شہناز اختر) کے شوہر (محمد عرفان منہاس) نے اپنی والدہ کے ساتھ مل کر سازش کے تحت رات کے دوران شہناز کا گلا گھونٹ کر اسے ابدی نیند سلادیا، بعد ازاں اندھیرے میں ہی لاش کو گھر سے قریب 100 میٹر کے فاصلے پر پھینک دیا تھا۔
مزید پڑھیں: پونچھ: سڑک حادثے میں 2 نوجوان ہلاک
24 اگست کو لاش ملنے کے بعد پولیس نے کیس درج کرکے تفتیش شروع کردی تھی۔ پولیس کے مطابق تفتیش کے دوران مزید معلوم ہوا ہے کہ پولیس اہلکار محمد عرفان سرینگر کے بٹہ مالو میں تعینات تھا اور قتل کی رات اپنے گھر آیا تھا جہاں اس نے اپنی زوجہ کو قتل کرنے کے بعد رات کے دوران ہی واپس سرینگر روانہ ہوگیا۔
پولیس ذرائع کے مطابق ’’قتل کو سوچے سمجھے منصوبے کے ساتھ انجام دیا گیا تھا، جب کہ ثبوت و شواہد کو چھپانے/مٹانے کی پوری کوشش کی گئی تھی۔‘‘
