محکمہ صحت کے ذرائع کے مطابق متاثروں کی تعداد بڑھ کر 13737 ہوگئی ہے۔ پانچ مریضوں کی موت گنجم ضلع میں ہوئی جبکہ خردہ اور کٹک ضلعے میں ایک ایک شخص کی موت ہوئی ہے۔
نئے معاملے ریاست کے 23 ضلعوں سے سامنے آئے ہیں۔ ان میں 415 معاملے کورنٹائن سینٹروں کے ہیں اور دیگر مقامی رابطے کے معاملے ہیں۔
اس درمیان گنجم ضلع میں کورونا وائرس سے متاثر ایک سترہ سالہ نوجوان کی بھی موت ہوگئی۔ وہ پھیپھڑے کے کینسرسے متاثر تھا اور موت کی وجہ یہ بیماری بتائی جارہی ہے۔ ریاست میں کورونا کے علاوہ دیگر بیماریوں سے ہونے والی اموات کی تعداد بڑھ کر اکیس ہوگئی ہے۔ اس کے ساتھ ہی کورونا کی وجہ سے مرنے والوں کی مجموعی تعداد بڑھ کر 91 ہوگئی ہے۔
ذرائع نے بتایا کہ ریاست میں اب تک8750 مریض صحتیاب بھی ہوچکے ہیں۔ راحت کی بات یہ ہے کہ متاثر مریضوں کے صحت یاب ہونے کی شرح 63.69 فیصد ہوگئی ہے۔ ریاست میں فی الحال سرگرم معاملے 4896 ہیں جن کا مختلف اسپتالوں میں علاج کیا جارہاہے۔
