Woman Gives Birth To Baby In Ambulance خاتون نے ایمبولینس میں بچے کو جنم دیا

اورنگ آباد میں ایک حیران کرنے والا معاملہ سامنے آیا. حاملہ خاتون نے چلتی ایمبولینس میں لڑکے کو جنم دیا۔ حیران کن بات یہ ہے کہ ایمبولینس میں نہ تو کوئی ڈاکٹر تھا اور نہ ہی کوئی نرس، اس کے باوجود ڈیلیوری نارمل ہوگئی۔

اورنگ آباد: ریاست مہاراشٹر میں اورنگ آبادر ضلع کے لونی گاؤں کی رہنے والی 20 سالہ حاملہ خاتون کو درد کی شکایت کے بعد ویجا پور تحصیل کے سرکاری اسپتال لے جایا گیا جہاں ڈیوٹی پر موجود ڈاکٹر اور نرسوں نے لاپرواہی کا مظاہرہ کرتے ہوئے خاتون کو آرام کرنے کا مشورہ دیا۔ جبکہ حاملہ خاتون کے رشتہ داروں نے ڈاکٹروں اور نرسوں سے خاتون کو ہسپتال میں داخل کرنے کا مطالبہ کیا لیکن ڈاکٹروں نے ان کی ایک نہ سنی۔ ڈاکٹروں نے خاتون کو اورنگ آباد کے سرکاری ہسپتال گھاٹی لے جانے کو کہا۔ گھر والوں نے خاتون کو ایمبولینس میں بیٹھا کر ویجا پور کے سرکاری ہسپتال سے اورنگ آباد کے گھاٹی ہسپتال کے لئے روانہ ہوئے تاہم راستہ میں ہی گنگاپور کے قریب ایمبولنس میں ہی خاتون نے بچہ کو جنم دیا اور نارمل ڈیلیوری ہوگئی۔ اس وقت ایمبولینس میں خاتون کی چچی موجود تھیں جنہوں نے اس موقع پر خاتون کی مدد کی۔

اس کے بعد بچے اور اُس کی ماں کو ہسپتال میں داخل کیا گیا فی الحال ماں اور بچہ دونوں صحت مند ہیں۔ واقعہ کے بعد ویجاپور کے سرکاری ہسپتال میں موجود ڈاکٹروں پر سوال اٹھ رہے ہیں کہ ایسے وقت میں جب نارمل ڈیلیوری ہوسکتی تھی تو پھر ڈاکٹروں نے اورنگ آباد کے گھاٹی اسپتال میں آپریشن کے لئے خاتون کو کیوں بھیجا؟ گھر والوں نے ڈاکٹروں اور نرسوں پر لاپرواہی کا الزام لگایا۔ انہوں نے کہاکہ ہسپتال میں ہی نارمل ڈلیوری ہوسکتی تھی لیکن ڈاکڑوں نے ذمہ داری نہیں لی۔