ممبئی: مہاراشٹر میں گوگاولے کا مسئلہ فی الحال ارکان اسمبلی کے درمیان بحث کا موضوع بنا ہوا ہے۔ شندے گروپ نے اجیت پوار کی بطور وزیر خزانہ تقرری کی مخالفت کرتے ہوئے الزام لگایا تھا کہ اجیت پوار جب مہاوکاس آگھاڑی حکومت میں وزیر خزانہ تھے تب شیو سینا کے اراکین اسمبلی کو فنڈ فراہم کرنے میں بھید بھاؤ کیا تھا۔ اس بار اجیت پوار نے ایکناتھ شندے گروپ کی تمام شکایتیں دور کرنے کی کوشش کی ہے۔ مہاراشٹر کی سیاست میں یہ بھی موضوع بحث ہے کہ اجیت پوار اگرچہ این سی پی کے ایک بڑے طبقے سے الگ ہو چکے ہیں پھر بھی انہوں نے فنڈ کی تقسیم میں دونوں خیموں کا پورا خیال رکھا ہے۔
یہ بحث چل رہی ہے کہ اجیت پوار نے این سی پی کو 580 کروڑ دیے ہیں۔ جس میں سابق وزیر صحت راجیش ٹوپے کو 280 کروڑ روپے اور بھتیجے روہت پوار کو 210 کروڑ روپے ملے جب کہ جینت پاٹل نے بتایا کہ انہیں 20 کروڑ روپے الاٹ کیے گئے ہیں۔ کہا جا رہا ہے کہ اجیت پوار بھی جینت پاٹل کو اپنے ساتھ لانے کی کوشش کر رہے ہیں۔ مہاراشٹر میں یہ چرچے شروع ہو گئے ہیں کہ آنے والے دنوں میں جینت پاٹل بھی اجیت پوار کے گروپ میں شامل ہو سکتے ہیں۔ یہ بھی چرچا ہے کہ پاٹل محکمہ آبپاشی کا مطالبہ کر رہے ہیں۔ اگر انہیں اپنی پسند کا محکمہ مل جاتا ہے تو وہ اجیت پوار کے خیمے میں جا سکتے ہیں۔ اگر ایسا ہوتا ہے تو جینت پاٹل کے خیمے کے اراکین اسمبلی بھی ان کے ساتھ جائیں گے۔ جو شرد پار کے لیے بڑا دھچکا ہو گا۔
دوسری طرف روہت پوار کے اجیت پوار کے ساتھ جانے کے امکانات بہت کم ہیں لیکن اجیت پوار نے اپنے سابق ساتھی جتیندر اوہاڈ کو فنڈز مختص نہیں کیے ہیں۔ یہ بھی کہا جا رہا ہے کہ شنڈے گروپ نے اس کے لیے اجیت پوار پر دباؤ ڈالا ہے۔ یہ بھی چرچا ہے کہ شرد پوار کے کئی رکن اسمبلی جنہیں فنڈز نہیں ملے ہیں یا کم فنڈ ملے ہیں ان میں بے چینی کا ماحول ہے۔ وہ محسوس کر رہے ہیں کہ اجیت پوار کے ساتھ جانے کا فائدہ ہے۔ ان کا خیال ہے کہ عوام کے کاموں کے لیے فنڈز درکار ہوں گے۔ جو صرف اجیت پوار ہی دے سکتے ہیں۔ ایسے میں اگر مستقبل میں دوبارہ این سی پی میں پھوٹ پڑتی ہے تو اس میں حیرت کی کوئی بات نہیں ہے۔
