ممبئی: مہاراشٹر کی سیاست میں ہلچل ہے کہ کیا اجیت پوار اپنے چچا شرد پوار کو چھوڑ کر بی جے پی میں شامل ہوں گے۔ پچھلے کچھ دنوں سے اس سے جڑی کئی باتیں سامنے آئی ہیں اور کئی واقعات بھی اسی کی گواہی دے رہے ہیں۔ چاہے وہ اجیت پوار کا چند گھنٹوں کے لیے اچانک غائب ہو جانا ہو یا بی جے پی کے خلاف نرمی والا موقف اپنانے کا معاملہ ہو۔ سنجے راوت نے بھی شیوسینا کے اخبار سامنا میں لکھا ہے کہ اجیت پوار دہلی گئے اور امت شاہ سے ملاقات کی۔ تاہم، شرد پوار نے یہ ضرور کہا ہے کہ این سی پی بطور پارٹی کبھی بھی بی جے پی کے ساتھ نہیں جائے گی۔ کوئی ذاتی طور پر فیصلہ کرے تو الگ بات ہے۔
اگر ہم اس سلسلے میں تازہ ترین پیش رفت پر نظر ڈالیں تو آج پھر اچانک اجیت پوار کے دن بھر کے تمام پہلے سے طے شدہ پروگرام منسوخ کر دیے گئے ہیں۔ دوسری طرف مہاراشٹر بی جے پی کے ریاستی صدر چندر شیکھر باونکولے پیر کو اچانک دہلی روانہ ہو گئے۔ کہا جا رہا ہے کہ وہ ایک اہم میٹنگ میں شرکت کے لیے دہلی گئے ہیں۔ ایم ایل اے آشیش شیلر بھی باونکولے کے ساتھ دہلی گئے ہیں۔ یہ بھی چرچا ہے کہ دونوں رہنما امت شاہ سے ملاقات کریں گے۔ اب ان دونوں واقعات کو ریاست کی سیاست سے جوڑا جا رہا ہے۔
- یہ بھی پڑھیں:
Ajit Pawar اجیت پوار کی شندے و فڑنویس کے ساتھ ملاقات
ایک بار پھر یہ بحث شروع ہو گئی ہے کہ اجیت پوار جلد ہی کوئی بڑا سیاسی دھماکہ کرنے والے ہیں۔ معلومات کے مطابق اجیت پوار پونے جارہے تھے لیکن وہ ابھی تک ممبئی میں ہیں۔ جب کہ این سی پی کے صدر شرد پوار اور ایم پی سپریہ سولے بارامتی میں ہیں۔ اجیت پوار کے اپنے تمام پروگراموں کی اچانک منسوخی سے سیاسی حلقوں میں ہلچل مچ گئی ہے۔
