سپریم کورٹ کے فیصلہ کا استقبال کرتے ہیں: فڑنویس

مہاراشٹر کے سابق وزیر اعلی دیویندر فڈنویس نے آج کہا کہ ایودھیا میں مندر۔مسجد تنازعہ پر سپریم کورٹ کے فیصلہ کو تسلیم کرتے ہیں اور اس فیصلےکا استقبال کرتے ہیں۔ عوام کو بھی اس فیصلہ کا احترام کرنا چاہئے۔

مہاراشٹر کے سابق وزیر اعلی دیویندر فڈنویس نے سپریم کورٹ کے فیصلہ پر ردعمل ظاہر کرتے ہوئے کہا کہ 'ہم سب کو فیصلہ کا استقبال کرنا چاہئے۔ یہ ملک میں پیار محبت اور ہم آہنگی کے ماحول کے لیے انتہائی اہم ہے۔'
انھوں نے لوگوں سے ہم آہنگی قائم رکھنے کی اپیل کرتے ہوئے کہا کہ ذاتی طور پر انکی سبھی لوگوں سے درخواست ہے کہ اس معاملہ پر اب کوئی تنازعہ نہیں ہونا چاہئے۔

سابق وزیر اعلی دیویندر فڈنویس نے مہارشٹر کے عوام کا بھی شکریہ ادا کیا اور کہا کہ یہاں کی عوام کا شکریہ کہ انہوں نے کسی طرح کی کشیدگی کا مظاہرہ نہیں کیا۔انہوں نے انتظامیہ کا بھی ذکر کیا کہ ان سب نے سخت انتظامات کیے اور کسی بھی ناخوشگوار واقعہ سے نمپٹنے کے لیے انتظامیہ چاق و چوبند نظر آیا۔

وزیر اعلی نے کہا کہ سپریم کورٹ کا فیصلہ بہت واضح ہے۔ انھوں نے حکومت کو کچھ ذمہ داری بھی دی ہے۔
واضح رہے کہ سپریم کورٹ کے پانچ ججوں کی آئینی بنچ نے ایودھیا تنازعہ پر فیصلہ سناتے ہوئے 2 اعشاریہ 77 ایکڑ متنازعہ زمین رام للا وراج مان کو دینے کا حکم دیا ہے۔ اس کے ساتھ ہی مسلم فریق کو مسجد کی تعمیر کے لیے 5 ایکڑ متبادل زمین ایودھیا میں ہی کہیں اور دینے کا بھی حکم دیا ہے۔