دو موٹر سائیکل چور گرفتار

ریاست مہاراشٹر کے اورنگ آباد شہر میں چوری کی واردات انجام دینے والے دو چوروں کو پنڈلک نگر پولیس نے گرفتار کیا ہے اور ان کے قبضے سے چھ موٹر سائیکل سمیت مسروقہ مال بھی ضبط کیا ہے۔

پولیس ذرائع سے ملی تفصیلات کے مطابق شہر کے مختلف مقامات پر نقب زنی کی وارداتیں انجام دینے والے عادی نقب زن ، پنڈلک نگر علاقہ میں گھوم رہے ہیں۔ اس طرح کی اطلاع پنڈلک نگر ڈی بی اسکواڈ کے سب انسپکٹر پربھاکر سوناؤنے کو ایک مخبر نے دی۔

اطلاع ملنے پر سب انسپکٹر پربھاکر اور ان کی ٹیم نے جال بچھا کر چھاپہ ماری کی اور عادی نقب زن آکاش بھیم راؤ شندے (19 سال) ساکن گوتم نگر ، گجانن سبھاش مکڑے (20 سال) ساکن مکند نگر کو حراست میں لے کر پوچھ گچھ کی۔ دوران پوچھ گچھ ملزمین نے شہر کے مختلف مقامات پر نقب زنی کی وارداتیں انجام دینے کا اعتراف کیا۔ ساتھ ہی شہر کے مختلف علاقوں سے موٹر سائیکل چوری کرنے کا بھی اعتراف کیا جس کے بعد پولیس نےعادی نقب زن کے قبضے سے دو لاکھ روپے مالیت کی چھ موٹر سائیکلیں ضبط کی ہیں اور مزید تفتیش جاری ہے۔