تبلیغی اجتماع ممبئی کے وڈالا میں ہونے والا تھا لیکن لاء اینڈ آرڈر کے پیش نظر پولیس نے اجتماع کو چیتا کیمپ میں منتقل کر دیا۔
اس اجتماع میں ممبئی اور مہاراشٹر سے ہزاروں افراد کی شرکت ممکن ہے، چالیس روزہ جماعت کے ارکان کی اکثریت اس اجتماع میں شریک ہوگی، جبکہ ممبئی کے الگ الگ علاقوں سے بھی مسلمان پہلے دن اور تیسرے دن دعائیہ اجتماع میں شریک ہوں گے۔
واضح رہے کہ ملک کے موجودہ حالات سے پیش نظرحکام نے اس تبلیغی اجتماع کو وڈالا سے شمال مشرقی علاقہ چیتا کیمپ میں منتقل کردیا ہے، اس کی ایک وجہ ظاہری طور پر موجودہ ملکی حالات کو بتایا جارہا ہے۔
تبلیغی جماعت سے وابستہ ایک ذمہ دار نے کہا کہ شہری انتظامیہ نے وڈالا میں مختلف قسم کی رکاوٹیں پیدا کرنے کی کوشش کی ہے اور اسی وجہ سے اجتماع کو ان کی ایماء پر چیتا کیمپ منتقل کردیا گیا، دراصل وڈالا ایسٹرن فری وے کے قریب واقع کسٹم اور سالٹ کمیشن کی مخصوص خالی زمین پر اجتماع منعقد کرنے کا منصوبہ تھا اور مقامی رکن پارلیمان نے اس میں تعاون کا یقین دلایا لیکن مسلم آبادی کے قریب واقع اس مقام پر اجتماع کی اجازت نہیں مل سکی جبکہ آپسی تال میل کی کمی بھی ایک سبب بتایا جارہا ہے۔
چیتا کیمپ کے اس سہ روز اجتماع میں شرکت کے لیے ممبئی، مہاراشٹر اور آس پاس کی ریاستوں سے جماعتیں آنا شروع ہوگئی ہیں، اجتماع میں 40 روز کے لیے جانے والی جماعتوں کے ارکان کی اکثریت ہوگی۔
سہ روزہ تبلیغی اجتماع اتوار کو بعد نماز عصر دعا کے ساتھ اختتام پذیر ہوگا۔
اجتماع کے منتظمین کا کہنا ہے کہ اتوار کی تعطیل کے سبب شرکاء کی تعداد میں اضافہ ہونے کا امکان ہے اس تعلق سے اجتماع گاہ میں خصوصی انتظامات کیے گئے جبکہ پولیس نے بھی حفاظتی انتظامات سخت کردیئے ہیں تاکہ کسی بھی قسم کا کوئی ناخوشگوار واقعہ نہ پیش آئے اس کے علاوہ اجتماع گاہ تک آنے والی سواریوں کے لیے ٹریفک پولیس نے بھی خصوصی بندوبست کیا ہے۔
