مہاراشٹر اسمبلی انتخابات میں مالیگاؤں حلقہ اسمبلی میں ایم آئی ایم سے مفتی محمد اسماعیل قاسمی اور کانگریس سے شیخ آصف کے درمیان مقابلہ راست مقابلے کا امکان ہے لیکن بطور آزاد امیدوار انتخابی میدان میں اترنے والے معروف سماجی کارکن رضوان بیٹری والا کو بھی عوام سے بھر پور ووٹوں کی امید ہے۔
رضوان بیٹری والا اسمبلی انتخابات میں آزاد امیدواری کر رہے ہیں، وہ گزشتہ ایک دہائی سے زائد عرصے سے سماجی و فلاحی کاموں میں مصروف ہیں اور ان کا احتجاج کرنے کا منفرد طریقہ عوام کی متوجہ کرتا ہے۔
رضوان بیٹری والا ہر طرح کے بنیادی مسائل پر آواز بلند کر کے عوام کے دلوں میں جگہ بنانے میں کامیاب بھی ہوئے اور ان کے سماجی کارناموں کی لمبی فہرست ہے۔
واضح رہے کہ مالیگاؤں میں ایم آئی ایم پارٹی کو سب سے پہلے انھوں نے متعارف کرایا تھا اور اسد الدین اویسی کو شہر کا دورہ کرایا لیکن انھیں ایم آئی ایم کی جانب سے کبھی بھی کسی بھی الیکشن میں ٹکٹ نہیں دیا گیا۔
رضوان بیٹری والا مالیگاؤں شہر میں ہو رہی بدعنوانیوں کے خلاف آواز بلند کرتے رہے ہیں اور عوام میں مقبولیت حاصل کی۔
چاہے وہ شہیدوں کی یادگار کا مسئلہ ہو، جونا آگرہ روڈ کی خستہ حالی، کارپوریشن کے جعلی کاموں کا پردہ فاش کرنا ہو یا غریبوں کی مدد کرنا ہر معاملے میں رضوان بیٹری والا ہمیشہ آگے آگے رہے ہیں۔
عوامی مسائل کے حل کے لیے ہمہ وقت تیار رہنے والے رضوان بیٹری والا کا کہنا ہے کہ وہ ہی ووٹوں کے اصل حقدار ہیں۔
کل ہونے والی پولنگ میں مفتی محمد اسماعیل قاسمی اور شیخ آصف کے درمیان راست مقابلہ ہے لیکن ان دونوں میں سے کون جیتے گا اس کا فیصلہ رضوان بیٹری والا کی ملنے والی ووٹ ہی طے کر ے گی کیوں کہ رضوان بیٹری والا نے کسی بھی پارٹی کو حمایت دینے سے انکار کیا ہے۔
