بالی ووڈ کی ممتاز و مشہور اداکارہ شبانہ اعظمی کی کار آج دوپہر تقریباً تین بجے اس وقت حادثے کا شکار ہوگئی جب وہ اپنے شوہر جاوید اختر کے ساتھ پونے میں ایک تقریب میں شرکت کرنے کے لیے جارہی تھیں۔
واضح رہے کہ گزشتہ جمعہ کو ملک کے معروف مصنف و شبانہ اعظمی کے شوہر جاوید اختر کی 75ویں سالگرہ تھی اور ان کی سالگرہ سے متعلق ایک تقریب میں شرکت کے لیے شبانہ اعظمی اور جاوید اختر دونوں اپنی کار کے ذریعے پونے کی سمت میں روانہ ہوئے تھے۔
لیکن خالہ پور ٹول ناکہ سے چند کلو میٹر کی دوری پر ان کی کار کی ٹکر ایک مال بردار ٹرک سے ہوگئی جس میں کار ڈرائیور اور شبانہ اعظمی بری طرح سے زخمی ہوئے۔
اس حادثے میں جاوید اختر بال بال بچے جبکہ کار کو شدید نقصان پہنچا ہے۔ مزید یہ کہ شبانہ اعظمی کی ناک اور چہرے پر کافی چوٹیں آئیں ہیں۔
اطلاع ملنے کے فوراً بعد راحت رسانی کے دستے جائے حادثہ پر پہنچے اور انھیں پنویل کے ایم-جی-ایم اسپتال ابتدائی علاج کے لیے داخل کرایا گیا اور پھر بعد میں انھیں اندھیری میں واقع کوکیلا بین امبانی اسپتال میں بہتر علاج کے ریفر کردیا گیا جہاں ان کی حالت اب بہتر بتائی جارہی ہے۔
