مہاراشٹر میں گذشتہ دو مہینوں کے دوران سادھوؤں کے قتل کا یہ دوسرا معاملہ ہے جبکہ قبل ازیں 16 اپریل کو پالگھر میں دو سنتوں کو ایک بھیڑ نے قتل کردیا تھا۔ ابھی یہ معاملہ تھما ہی نہیں تھا کہ ناندیڑ میں ایک اور سادھو کے قتل کا واقعہ سامنے آیا ہے۔
پالگھر واقعہ کے بعد سے ہی اپوزیشن جماعتوں کی جانب سے ادھو ٹھاکرے حکومت پر تنقیدیں کی جارہی تھی۔ تاہم اب اس میں مزید شدت پیدا ہوگئی۔
اطلاعات کے مطابق ناندیڑ کے ایک آشرم میں رہنے والے سادھو شیوچاریہ گرو ناگاتھنکر کو نامعلوم افراد نے قتل کردیا۔ یہ واقعہ ہفتہ کی رات پیش آیا۔
آج صبح سادھو شیوچاریہ کی لاش آشرم میں پائی گئی۔
اطلاع کے فوری بعد پولیس حرکت میں آگئی اور جائے واقعہ پر پہنچ کر لاشوں کو ضلعی ہسپتال منتقل کیا گیا جہاں ان کا پوسٹ مارٹم کیا جائے گا۔ اس سلسلہ میں پولیس نے ایک مقدمہ درج کر کے تحقیقات کا آغاز کر دیا ہے۔
پولیس نے بتایا کہ قاتلوں کی شناخت کر لی گئی ہے اور بہت جلد انہیں گرفتار کیا جائے گا۔