مالیگاؤں: جمعیت اہل حدیث کی جانب سے راشن کٹس تقسیم کی گئی

ریاست مہاراشٹر کے مسلم اکثریتی شہر مالیگاؤں میں لاک ڈاؤن کی وجہ سے ہزاروں خاندان روزانہ کی خوراک سے محروم ہوچکے ہیں۔ بے روزگاری کی وجہ سے لوگ فاقہ کی زندگی گذارنے پرمجبور ہوگئے ہیں۔

شہر مالیگاؤں میں کئی دینی وملی اور سماجی و سیاسی جماعتوں نے بھی ضرورت مندوں تک ضروری اشیاء پہنچانے کاکام جاری رکھے ہوئے ہیں۔ اس سلسلے میں جمعیت اہل حدیث مالیگاؤں نے بھی اہل خیر حضرات کے تعاون سے ضرورت مندوں تک راشن کٹس پہنچانے کا نظم کیا۔

پہلی قسط میں سینکڑوں گھروں تک راشن کٹس پہنچایا۔ اس کے بعد رمضان المبارک میں راشن کٹس کی دوسری قسط کا نظم کیا گیا۔ اب تک بلاتفریق مسلک تقریباً ایک ہزار سے زائد خاندانوں تک راشن کٹس بحسن وخوبی پہنچائی گئی۔

اس پورے کام کی سرپرستی ڈاکٹر سعید احمد فیضی صاحب نے کی۔ جبکہ مولانا شکیل احمد فیضی کی نگرانی اور ان کے رفقاء کار کی کارکردگی بھی قابل ستائش ہے۔