چند روز قبل دہلی پولیس کی خاتون اہلکار کے ساتھ جنسی زیادتی کے بعد اسے قتل کرنے کا دل دہلادینے والا واقعہ پیش آیا تھا۔ اس کے بعد ملک کے مختلف شہروں میں احتجاج جاری ہے اور ملزمین کو گرفتار کرکے انہیں فوری طور پر پھانسی دینے کا مطالبہ کیا جارہا ہے۔
مہاراشٹر کےدارالحکومت ممبئی میں 'بھارت بچاؤ آندولن' اور ملی کونسل کے ذمہ داروں نے چرچ گیٹ ریلوے اسٹیشن کے باہر خاتون پولیس اہلکار کے اہل خانہ کو انصاف دلانے کے لیے پر امن طریقے سے مظاہرہ کیا۔
ملی کونسل کے ذمہ دار اور سماجی کارکن ایم اے خالد نے کہا کہ 'دہلی پولیس میں خاتون کانسٹیبل کے ساتھ جس طرح کا ظالمانہ عمل انجام دیا گیا وہ انتہائی شرمناک ہے اس لیے اس معاملے کی اعلیٰ سطحی جانچ ہونی چاہیے حتیٰ کہ اس کیس کو سی بی آئی کے سُپرد کر دیا جانا چاہیے تا کہ خاطیوں کو فوری طور پر گرفتار کر کے انہیں سخت سے سخت سزا دی جا سکے۔
چونکہ کورونا گائڈ لائنز کے پیش نظر شہر میں کسی بھی طرح کے ہجوم پر پابندی ہے اس لیے محض 10 لوگوں کو ہی احتجاج کرنے کی اجازت دی گئی تھی۔
