کورونا وائرس اور لاک ڈاؤن کے سبب پورے ملک میں تمام قسم کی سرگرمیاں ٹھپ تھیں لیکن ان حالات آہستہ آہستہ معمول پر آرہے ہیں اور دکانیں، سنیما ہال اور مذہبی مقامات کو کھولنے کی اجازت دے دی گئی ہے۔
اس دوران مہاراشٹر کے تاریخی شہر اورنگ آباد میں سیاحتی مقامات کو کھولنے کے لیے بی بی کا مقبرہ کے سامنے سینکڑوں چھوٹے کاروبایوں نے احتجاج کیا۔
سیاحتی مقامات بند ہونے کی وجہ سے سینکڑوں خاندانوں کا کاروبار متاثر ہوا ہے اور سیاحوں میں بھی ناراضگی پائی جارہی ہے۔
یہ احتجاجی دھرنا ریپبلکن پارٹی آف انڈیا کی قیادت میں دیا گیا۔ مظاہرین کا کہنا ہے کہ کورونا وبا کا زور اب مہاراشٹر میں کم ہورہا ہے مذہبی مقامات اور دیگر تمام ادارے کُھل رہے ہیں تاہم سیاحتی مقامات پر ابھی بھی تالے پڑے ہوئے ہیں جس کی وجہ سے ہزاروں افراد کا روزگار متاثر ہورہا ہے۔
مظاہرین نے مزید کہا کہ 'محکمہ آثار قدیمہ نے اگر فوری ایکشن نہیں لیا تو لوگ بُھکمری کا شکار ہوجائیں گے، اس کے علاوہ ان مقامات کو دیکھنے کے لیے دور دراز مقامات سے آنیوالے سیاحوں کو بھی مایوسی کا سامنا کرنا پڑ رہا ہے۔
عوامی سطح پر بھی تاریخی اور سیاحتی مقامات کو فوری طور پر مقامی عوام کے لیےکھولنے کا مطالبہ کیا جارہا ہے۔
