ممبئی کرائم برانچ نے ملزمین سے پوچھ گچھ کے لیے مزید پولیس حراست طلب کی تھی لیکن عدالت نے ان کی درخواست کو مسترد کر دیا۔
کرائم برانچ نے بتایا کہ 'اس واقعے کے بعد اب تک خودکشی نوٹ نہیں ملا ہے۔ یہ تینوں ملزمین ایسے جواب دے رہی ہیں جیسے ان کو سکھایا گیا ہو۔'
کرائم برانچ نے یہ دعویٰ بھی کیا کہ ملزمین تفتیش میں ساتھ نہیں دے رہے ہیں۔ان سے روبرو پوچھ گچھ کرنے کے لیے پولیس حراست کی ضرورت ہے۔
کرائم برانچ کے مطابق جس دن پائل نے خودکشی کی، اس روز وہ ملزمین کے ساتھ تھیں اور یہ واقعہ دوپہر کے بعد پیش آیا۔ اس درمیان کیا ہوا یہ معلوم کرنا بہت ضروری ہے۔
پائل تڑوی معاملے میں گواہ اسنیہل شندے نے ملزمین کے خلاف گواہی دی۔ اسنیہل شندے پائل کی معاون تھیں۔
ایڈوکیٹ راجا ٹھاکرے نے بتایا کہ 'اسنیہل کے سامنے پائل پر ذات پات پر مبنی تبصرہ کیا گیا۔ ڈاکٹر ہیما آہوجہ نے پائل کو کہا تھا کہ تو پسماندہ طبقے کے کوٹے سے آئی ہے لیکن میں نے رینک حاصل کیا ہے اور ٹاپ کیا ہے۔
ملزمین کے وکیل آبات پونڈا نے کہا کہ '21 تاریخ کو یہ واقعہ پیش آیا۔ 23 تاریخ کو کیس درج کیا گیا لیکن اب تک پولیس کو کچھ بھی ٹھوس نہیں ملا ہے۔ اگر سوسائڈ نوٹ ہوتا تو ضرور ملتا۔ پولیس کو سوسائڈنوٹ تلاش کرنا چاہیے۔'
