فائر بریگیڈ سے موصولہ اطلاعات کے مطابق گزشتہ شب نو بجے کے قریب میمن واڑہ میں واقع یوسف چال کا ایک حصہ منہدم ہو گیا تھا جس سے علاقہ میں سنسنی پھیل گئی تھی۔
عمارت کے اطراف کے علاقوں سے عاشورہ کا جلوس نکالا جا رہا تھا اور علاقہ میں گہما گہمی تھی واقعہ کی اطلاع ملنے کے بعد فائر بریگیڈ کی سات گاڑیاں جائے حادثہ پر پہنچیں جہاں ملبہ سے 14افراد کو بحفاظت نکالنے میں کامیابی حاصل کی۔
جبکہ ابھی بھی 2 افراد کے ملبہ میں پھنسے رہنے کی اطلاع ہیں اور راحتی کام جاری ہیں، مزید تفصیلات کا انتظار ہے۔
واضح رہے کہ گزشتہ ماہ ہی ڈونگری میں ایک عمارت گر جانے کی وجہ سے 15لوگوں کی موت ہو گئی تھی اور 13لوگ زخمی ہو گئے تھے۔ عمارت گرنے پر اپنے شدید رنج کا اظہار کرتے ہوئے عاشقان رسول اکیڈمی کے صدر حاجی حقیق اللہ نے کہا کہ یہاں لوڈ بیئرنگ کی عمارتیں زوروں پر تعمیر ہو رہی ہیں۔
انہوں نے کہا کہ ابھی ایک روز قبل ہی چنچ بندر میں زیر تعمیر عمارت کا سلیب گرنے سے ایک شخص کی موت ہو گئی اور ایک شخص شدید طور پر زخمی ہو گیا۔
حاجی حقیق اللہ نے شکایتی انداز میں کہا کہ یہاں کے رکن اسمبلی اور میونسپل کارپوریٹر کیا کر رہے ہیں کہ ایسے حادثات ہو رہے ہیں انہوں نے سوالیہ انداز میں کہا کہ اس طرح سے لوگوں کی زندگی کے ساتھ کھلواڑ ہو رہا ہے اور مقامی رکن اسمبلی اور میونسپل کارپوریٹر خاموش ہیں انہیں کچھ فرق ہی نہیں پڑتا جبکہ انہیں مقامی عوام کی فکر کرنی چاہیئے اور اس طرح کے حادثات نہ ہوں اس کیلئے کام کرنا چاہیئے۔
انہوں نے مزید کہا کہ دیکھتے دیکھتے ممبا دیوی حلقہ میں بلڈنگیں گررہی ہیں جس میں لوگوں کی جان جا رہی ہیں وہیں لوگ زخمی ہو رہے ہیں اس پر توجہ دینے کی ضرورت ہے ۔
