ایک جانب جب چند افراد ملک کی قومی یکجہتی کی فضا میں نفرت کا زہر گھولنے کی کوشش کرتے ہیں تو وہیں دوسری جانب ایسے بھی لوگ موجود ہیں جو بلا تفریق مذہب و ملت ہر کسی کی مدد کرتے ہیں۔
اس قومی یکجہتی کے سلسلے کی ایک کڑی مہاراشٹر کے ضلع اورنگ آباد میں دیکھنے کو ملی جہاں روزہ داروں کے ساتھ مل کر غیر مسلم افراد نا صرف افطاری کا سامان تیار کرتے ہیں بلکہ انہیں غریب روزہ داروں میں مفت تقسیم بھی کرتے ہیں۔
کورونا وائرس کی روک تھام کے لیے نافذ کئے گئے لاک ڈاؤن کی وجہ سے ہر شخص مقید ہو کر رہ گیا ہے اور اس کا اثر رمضان المبارک پر بھی پڑا ہے اور افطار کے وقت دستر خوان کی شان بڑھانے والے پکوان کی کمی محسوس کی جا رہی ہے۔
اس بات کو مدنظر رکھتے ہوئے اورنگ آباد کے غیر مسلم افراد علاقے کے مسلم لوگوں کے ساتھ مل کر افطار کے وقت استعمال ہونے والے نکمین پکوان تیار کر کے انہیں روزہ داروں میں مفت تقسیم کر رہے ہیں۔
اس بابت علاقے کے لوگوں کا کہنا ہے کہ یہاں یہ بات قابل غور ہے کہ اس علاقے میں قومی یکجہتی کی مثال ایک عرصے سے دیکھی جا رہی ہے اور اب یہ ایک روایت بن گئی ہے کہ ہر شخص ہر انسان کی خوشی اور غم میں شریک ہوتا ہے اور ہر قسم کے تہوار مل جل کر مناتے ہیں۔
