ریاست مہاراشٹر کے اورنگ آباد میں مجلس اتحاد المسلمین کے رکن پارلیمان امتیاز جلیل نے کہا ہے کہ اتر پردیش بی جے پی حکومت نے لوجہاد قانون پر آرڈیننس پاس کیا ہے۔ لہذا لو جہاد قانون کے تحت بی جے پی کے شاہنواز حسین اور مختار عباس نقوی کو سلاخوں کے پیچھے ڈالنا چاہیے کیونکہ سب سے پہلے ان دونوں نے ہی لو جہاد کیا ہے۔
امتیاز جلیل نے کہا ہے کہ مودی حکومت دوہری سیاست کر رہی ہے اور حقیقی مسائل کو نظر انداز کر رہی ہے۔ لوجہاد کے معاملے پر قانون سازی ملک کے حقیقی مدعوں سے لوگوں کو بھٹکانے کا ایک ذریعہ ہے، مودی حکومت اس کی آڑ میں نفرت کی سیاست کو بڑھاوا دے رہی ہے۔ لو جہاد کے نام پر ایک مخصوص کمیونٹی کو نشانہ بنایا جارہا ہے۔
ان کا کہنا ہے کہ قانون سازی سے پہلے بی جے پی کے نقوی اور شاہ نواز کو سلاخوں کے پیچھے ڈالنا چاہیے لیکن ایسا کبھی نہیں ہوگا۔ امتیاز جلیل نے مودی حکومت پر دوہری سیاست کا الزام عائد کیا ہے۔
