ممبئی پولیس نے شہر میں بڑھتے ہوئے سائبر کرائم کی بڑھتی وارداتوں کے لیے اس محکمہ کی تشکیل دی ہے، لیکن ممبئی کی کروڑوں کی آبادی کے لیے تشکیل دیا گیا یہ واحد محکمہ شاید سائبر کرائم پر نکیل کسنے میں لاچار ثابت ہوا ہے۔
کیونکہ سائبر کرائم تعلق سے جاری کی گئی رپورٹ میں اس بات کا انکشاف ہوا ہے کہ اس معاملے میں ممبئی پہلے نمبر پر ہے جبکہ دہلی دوسرے نمبر پر ہے۔
اسی بات کے مد نظر اب ممبئی میں سائبر کرائم پر روک تھام کے لیے پولیس تھانے میں ہی اب سائبر سیل کی تشکیل کی گئی ہے، ممبئی پولیس کمشنر سنجے بروے نے کہا کہ ممبئی میں سائبر پولیس تھانے کی تعداد میں بھی اضافہ کیا جائے گا۔
پولیس کمشنر نے کہا کہ موجودہ دور میں پونزی اسکیمز کی طرز پر چھوٹی چھوٹی اسکیم کو لے کر اب سوشل سائٹس کے ذریعہ لوگوں میں بیداری لانے کے لیے مہم چلائی جائے گی تاکہ سائبر کرائم سے لوگ محفوظ رہ سکیں۔
پورے ملک میں اے ٹی ایم کے ذریعہ دھوکہ دہی کی وارداتیں روز بروز تیزی سے بڑھتی جا رہی ہیں، آر بی آئی نے سنہ 2018-19 کی جو تفصیلات پیش کی ہیں وہ بالکل حیران کن ہیں۔
بھارت میں گزشتہ برس اے ٹی ایم سے دھوکہ دہی کے 911 کیسز درج کیے گئے ہیں لیکن رواں برس یہ وارداتیں بڑھ گئی ہیں اور اب اس تعلق سے 980 کیسز درج کیے گئے ہیں۔
حیران کر دینے والی بات یہ ہے 233 کیسز صرف ریاست مہاراشٹر میں درج کیے گئے ہیں جو کہ پہلے نمبر پر ہے جبکہ دوسرے نمبر پر دہلی ہے۔
اس دھوکہ دہی میں اب تک ممبئی میں 5 کروڑ روپے کی دھوکہ دہی کی گئی ہے جبکہ دہلی میں 189 وارداتیں پیش آئی ہیں جس میں 3 کروڑ روپئے کی دھوکہ دہی کی گئی ہے۔
