مہاراشٹر کے دارالحکومت ممبئی کے ناگپاڑہ میں واقع سٹی سینٹر مال میں جمعرات کی رات میں تقریباً نو بجے آگ لگنے کا واقعہ پیش آیا تھا۔
مال میں لگی آگ پر قابو پانے کے لیے پہلے مقامی لوگوں نے کافی کوشش کی لیکن بعد میں تقریباً رات کے دو بجے فائر بریگیڈ کو اس کی اطلاع دی گئی۔
سٹی سینٹر مال تین منزلہ عمارت ہے، جہاں کئی چھوٹی چھوٹی دکانیں واقع ہے۔ عمارت کی جس منزل پر آگ لگی تھی وہاں موبائل، پرنٹرز، اسٹیشنری، فرنیچر اور دیگر چیزوں کی دکانیں واقع ہیں۔
ممبئی فائر بریگیڈ نے آگ پر قابو پانے کے لیے 24 فائر انجن، 16 جمبو ٹینک اور درجنوں راحت رسانی گاڑیوں کو جائے حادثہ پر تعینات کیا تھا، اس کے علاوہ محکمۂ فائر بریگیڈ کے 250 ملازمین مسلسل آگ بجھانے کی کوشش کر رہے تھے۔
آخر کار ممبئی فائر بریگیڈ نے اتوار کی صبح 5.08 بجے یعنی 56 گھنٹوں کے بعد مال میں لگی آگ کو بجھانے میں کامیابی حاصل کی حالانکہ آگ بجھانے کی کوشش میں محکمہ کے 6 اہلکار زخمی بھی ہوئے ہیں۔
علاوہ ازیں آتشزدگی کے اس واقعے سے مال میں واقع دکانوں کو کروڑوں کا نقصان ہوا ہے۔
