اورنگ آباد: ریاست مہاراشٹر کے اورنگ آباد میں پردھان منتری آواس یوجنا کے تحت اب تک ایک بھی غریب کو گھر نہیں ملا ہے، جس کے خلاف مجلس اتحاد المسلمین نے اورنگ آباد اسمارٹ سٹی دفتر کے باہر عام خاص میدان میں ایک پروگرام منعقد کیا، جس میں شہریوں کو مٹی کے گھر تقسیم کیے گئے اور انہیں چابیاں بھی دی گئی۔ اس دوران مجلس کے رکن پارلیمان سید امتیاز جلیل نے کہا کہ وزیر اعظم نریندر مودی نے شہریوں کو پردھان منتری آواس یوجنا کے جھوٹے سپنے دیکھائے تھے اور کہا تھا کے ان کے خود کا گھر ہوگا لیکن اسکیم کی معیاد ختم ہو چکی ہے اور اورنگ آباد شہر کے شہریوں کو اب تک اس آواس یوجنا کے تحت گھر نہیں ملا ہے۔ یہاں تک کہ اورنگ آباد پردھان منتری آواس یوجنا کے تحت اب تک زمین ہی فائنل نہیں کی گئی ہے۔
واضح رہے کہ مُلک کے غریب شہریوں کو ذاتی مکانات فراہم کرنے کیلئے وزیر اعظم آواس یوجنا شروع کی گئی تھی اور وزیر اعظم نریندر مودی نے اس اسکیم کی معرفت 31 مارچ 2022 تک ملک کے تمام غریب شہریوں کو ذاتی مکانات فراہم کرنے کا وعدہ کیا تھا، لیکن وزیر اعظم کا یہ اعلان پوری طرح کھوکھلا ثابت ہوا کیونکہ اورنگ آباد ضلع میں اس اسکیم پر عمل آوری کیلئے آج تک زمین کا انتخاب ہی نہیں ہو سکا ہے جبکہ مذکورہ اسکیم کی معیاد ختم ہو چکی ہے اور ملک کے دیگر شہروں میں اس اسکیم کے تحت گھر بھی تعمیر کر لیے گئے ہیں۔
اسی سلسلے میں اورنگ آباد شہر میں مجلس اتحاد المسلمین کی جانب سے عام خاص میدان پر شہر میں پردھان منتری آواس یوجنا کا فرضی افتتاح کیا گیا۔ بی جے پی اور وزیر اعظم مودی کی جانب سے گھر کل یوجنا کے ذریعے 2022 تک ملک کے ہر غریب کو اپنا گھر دینے کا اعلان کیا گیا تھا۔ اس پروگرام میں شہریوں کو سپنوں کے فرضی مکانات تقسیم کیے گئے۔ مذکورہ پروگرام عام خاص میدان پر اسمارٹ سٹی دفتر کے سامنے منعقد ہوا باضابطہ اس پروگرام کے لئے لیے ایک دعوت نامہ بھی چھاپا گیا تھا جس میں بی جے پی کے لیڈران ان اور ریاستی حکومت کے لیڈران کو بلایا گیا تھا۔
اس موقعے پر ضرورت مندوں کو گھر کی چابیاں بھی دی گئی اور اس طرح نریندر مودی وزیر اعظم کا ماسک لگائے ایک شخص کو بھی پردھان منتری آواس یوجنا کے تحت تعمیر شدہ مکان کی چابیاں سونپی گئی اس دوران مجلس کی جانب سے مٹی کے گھر بنائے گئے تھے اور وہ غریبوں میں بانٹے گئے۔
یہ بھی پڑھیں: Irregularity Accusation in PMAY: بنگہ ڈار علاقے کے غریب کنبے سرکاری آشیانے کے منتظر
