مہاراشٹر کے شہر مالیگاؤں کی سیوک سوسائٹی اور ایم آئی سی بلڈ ڈونر گروپ کی جانب سے گزشتہ روز پیدل مارچ کے ذریعہ جہیز مخالف مہم کا آغاز کیا گیا۔
مہاراشٹر کے مسلم اکثریتی شہر مالیگاؤں میں رکن اسمبلی مفتی محمد اسماعیل قاسمی کی سرپرستی میں یہ مہم شروع کی گئی۔ اس سلسلے میں گزشتہ دنوں سیوک سوسائٹی اور ایم آئی سی بلڈ ڈونر گروپ نے جامعتہ الصالحات سے شہیدوں کی یادگار تک پیدل مارچ نکالا۔
سماجی تنظیم سیوک سوسائٹی کے صدر سہیل ماسٹر نے ای ٹی وی بھارت کے نمائندہ کو بتایا کہ آج جہیز کے مطالبے کو لے کر سماج میں بے شمار خواتین پر ظلم و ستم ہو رہے ہیں۔
انہوں نے کہا کہ اس جہیز مخالف بیداری مہم کا مقصد جہیز کے طلبگاروں اور جہیز جیسی رسم کو سماج سے ختم کرنا اور لوگوں میں بیداری پیدا کرنا کہ لوگ جہیز کے نام پر بیٹیوں کو پریشان نہ کریں۔
موصوف نے مزید کہا کہ والدین کو بیٹی کی رخصتی کے وقت یہ حوصلہ دینا چاہئے کہ اگر سسرال میں اس کے ساتھ ظلم و زیادتی ہوتی ہو تو اس بات کی اطلاع فورا والدین کو دیں۔
سہیل ماسٹر نے اس بات پر روشنی ڈالی کہ اب مذہب کے نام پر، مسجد مندر کے نام پر، ہندو مسلم کے نام پر لڑنے سے گزیز کرنا چاہیے۔
اب وقت ہے کہ بیٹیوں کے تحفظ کے لیے لڑائی کی جائے اور جو لوگ جہیز کا مطالبہ کرتے ہیں، انہیں بھیک اور زکوۃ بھی مانگنی چاہیے۔
یہ بھی پڑھیں: سویزرلینڈ میں نقاب پر پابندی
واضح رہے کہ اس جہیز مخالف بیداری مہم کا اختتام شہیدوں کی یادگار پر مفتی محمد عامر یاسین ملک کی دعا کے ساتھ ہوا۔
