مالیگاؤں: مہاراشٹر کے شہر مالیگاؤں میں عوامی پارٹی کی جانب سے اردو میڈیا سینٹر میں پریس کانفرنس منعقد کی گئی۔ اس کانفرنس میں عوامی پارٹی کے صدر رضوان بیٹری والا نے دستور بچاؤ کمیٹی کے زیراہتمام 28 اکتوبر کو ہونے والے جلسہ عام کی تفصیلات پیش کی اور 12 نومبر تشدد معاملے پر تبادلہ خیال کیا۔ اس موقع پر رضوان بیٹری والا نے بتایا کہ 12 نومبر کو مالیگاؤں سمیت مہاراشٹر کے کئی اضلاع میں بند کے دوران تشدد پھوٹ پڑا تھا جبکہ مذکورہ معاملے میں گرفتار شدگان کی ضمانت پر رہائی 337 دن قید و بند صعوبتیں جھیلنے کے بعد ہوئی۔
رضوان بیٹری والا نے بتایا کہ دستور بچاؤ کمیٹی کے زیر اہتمام 28 اکتوبر کو انصار جماعت خانہ گراؤنڈ پر ایک جلسہ عام بعنوان 'عوامی عدالت' کے نام سے منعقد کیا جارہا ہے۔ اس جلسہ عام میں 12 نومبر تشدد معاملے میں پولس کا رویہ اور قوم کے غداروں کے ناموں کو عوامی عدالت میں عیاں کیا جائے گا۔ ایک سوال کے جواب میں رضوان بیٹری والا نے کہا کہ 'آگرہ روڈ پر دس سال میں پہلی دفعہ موجودہ رکن اسمبلی احتجاج کرتے نظر آئے وہ صرف اس لیے کہ میونسپل کارپوریشن الیکشن قریب ہے۔ رضوان بیٹری والا نے موجودہ رکن اسمبلی مفتی محمد اسماعیل قاسمی پر تنقید کرتے ہوئے کہا کہ 'آگرہ روڈ کی تکالیف کے لیے روڈ پر کیوں آئے 12 نومبر معاملہ میں کیوں خاموش رہے؟ مفتی اسماعیل نے جن افراد کو بچایا ہے ان کے نام عوام کو بتا دیں ہم شکریہ ادا کریں گے۔ ہم پولیس انتظامیہ سے اپیل کرتے ہیں کہ وہ عینک اتار کر سب کو ایک نظر سے دیکھیں۔ Malegaon violence Case
