ریاست مہاراشٹر کے مسلم اکثریتی شہر مالیگاؤں میں سی اے اے، این آر سی اور این پی آر کے خلاف مسلسل دھرنے، جلسے، جلوس اور مظاہرے جاری ہیں۔
پاسبان آئین ہند کمیٹی کی جانب سے گذشتہ چار روز سے مشاورت چوک ٹیپو سلطان ٹاور کے پاس شام میں چھ بجے سے رات دس بجے تک احتجاجی دھرنا جاری ہے۔ اس سے پہلے پاسبان آئین ہند کمیٹی کی جانب سے دس روزہ احتجاجی دھرنا شہیدوں کی یادگار قدوائی پر دیا گیا تھا۔نیز آئندہ بھی شہر کے اہم چوک چوراہوں پر یہ گشتی دھرنا جاری رہے گا۔
اس موقع پر سلیم رضوی نے کہا کہ حکومت این پی آر لاگو کرنے والی ہے۔ جس میں مختلف قسم کی معلومات مانگی جائے گی جس سے آپ کی شہریت ثابت ہو سکتی ہے۔ اسی لیے ہمیں این پی آر کی بھی مخالفت کرنا ہے۔
انھوں نے کہا کہ مالیگاؤں میں یکم اپریل سے تحریک عدم تعاون شروع کی جائے گی۔ اس تحریک میں حکومتی نمائندوں کو کاغذات و دیگر معلومات دینے سے انکار کرنا ہے۔ نیز ہر گھر کے باہر تحریک عدم تعاون کی تختی یا پوسٹر چسپاں کرنا ہے۔
بہوجن سماج پارٹی کے سینئیر کارکن آنند اڑاو نے اپنے وفد کے ساتھ پاسبان آئین ہند کمیٹی کے احتجاجی پروگرام میں شرکت کی۔
آنند اڑاو نے عوام سے اپیل کی کہ شہریت ترمیمی قانون کے خلاف مالیگاؤں میں بروز جمعہ 14 فروری 2020 کو دوپہر تین بجے جیل بھرو آندولن سٹی پولس اسٹیشن امبیڈکر پتلا پر ہونے والے مظاہرے میں وہ شرکت کریں۔
