آج ملک بھر میں ایک اندازے کے مطابق کئی کروڑ افراد منشیات اور نشیلی اشیاء کا استعمال بڑے پیمانے پر کر رہے ہیں جبکہ اس تعداد میں مسلسل اضافہ ہوتا جارہا ہے۔ خاص طور پر شہر مالیگاؤں میں مسلم طبقہ میں نشیلی اشیاء کے استعمال کا رجحان بڑھتا ہی جا رہا ہے، جو انتہائی تشویشناک ہے۔ اس سلسلے میں عائشہ نگر، دیانہ و دیگر اطراف کے محلے کی سرکردہ خواتین نے مل کر گزشتہ روز مقامی پولیس انتظامیہ کی ڈی وائے ایس پی لتا دونڈے کو ایک شکایتی مکتوب دیا۔
جس میں انہوں نے اس بات پر روشنی ڈالی کہ عائشہ نگر، رمضان پورہ اور دیانہ علاقوں میں نشیلی اشیاء کی کھلے عام خرید و فروخت کی جا رہی ہے۔ جس کی وجہ سے محلے کے بالغ و نابالغ نوجوان اس کی لت کا شکار ہو رہے ہیں۔ جس کی وجہ سے نشے میں دھت نوجوانوں کے ذریعے لوٹ مار، غنڈہ گردی، مار پیٹ، چوری کی وارداتوں میں اضافہ دیکھا جا رہا ہے۔ اس وفد میں موجود ایک خاتون نے ان شر پسندوں کی نشاندہی کرتے ہوئے ان کے خلاف مختلف پولیس اسٹیشنوں میں درج مقدمات کی تفصیل بتائی۔
مزید پڑھیں:جے پور: نشہ خوروں کے خلاف پولیس کی مہم، سو سے زیادہ نشہ خور گرفتار
موصوفہ نے بتایا کہ اور ایسے کئی مقدمات شہر و بیرون شہروں میں ان کے خلاف درج ہوئے ہیں۔ اس وفد کی تمام باتوں کو سننے کے بعد ڈی وائے ایس پی نے ہر ممکن تعاون کی یقین دہائی کرائی ہے اور کہا ہے کہ ایسے جرائم پیشہ وار افراد کے خلاف پولیس سخت کارروائی کرے گی۔
اس موقع پر ڈی وائے ایس پی نے عوام کو صلاح دی کہ جن افراد پر ان شر پسندوں نے ظلم کیا ہے وہ لوگ بلا خوف پولیس اسٹیشنوں میں شکایت درج کروائے اور جس پولیس اسٹیشنوں میں آپ کی سنوائی نہیں ہوتی ہے تو وہ ان سے رابطہ کریں۔
واضح رہے کہ ای ٹی وی بھارت کے نمائندے نے خواتین وفد سے بیان لینے کی کوشش کی لیکن شناخت ظاہر ہونے کے معاملات کی وجہ سے انہوں نے بیان دینے سے انکار کردیا۔
