ریاستی حکومت نے حالات کی نزاکت کو دیکھتے ہوئے مانسون اجلاس کو موخر کر دیا ہے اور اب یہ اجلاس 3 اگست کو ہوگا۔
قانون ساز کونسل کی مشاورتی کمیٹی کے ممبران کے ساتھ ودھان بھون میں ایک میٹنگ میں ہوئی اس میٹنگ میں مانسون اجلاس کتنے دنوں کا ہونا چاہئے؟ اس پر بحث کی گئی۔
صوبے میں کورونا وائرس کو دیکھتے ہوئے توقع کی جارہی ہے کہ یہ اجلاس دو ہفتوں سے زائد کا نہیں ہوگا۔
میٹنگ کے بعد اخبار نویسوں سے گفتگو کرتے ہوئے وزیراعلی ادھو ٹھاکرے نے تفصیلات بتائے ہوئے کہا کہ ہم گزشتہ دو ماہ سے زائد عرصے سے کورونا کے خلاف جنگ لڑ رہے ہیں، عوام اور سرکار ایک ساتھ اس جنگ میں شامل ہے۔
ادھو ٹھاکرے نے کہا کہ 'نسرگ طوفان آنے کے بعد میں نے طوفان سے متاثرہ تمام علاقوں کا دورہ کیا جس میں میں نے دیکھا کہ نقصان بہت زیادہ ہوا ہے اس کا پنچنامہ کرنے کے بعد متاثرین کو اس کی بھرپائی کی جائے گی۔
انہوں نے مزید کہا کہ 'اس وقت میں رائے گڑھ ضلع میں نقصان کا جائزہ لینے گیا تھا اسی وقت میں نے 100 کروڑ روپے راحتی فنڈ دینے کا اعلان کیا اس کے بعد رتناگری کو75 کروڑ اور سندھو درگ کو 25 کروڑ روپے کی مدد کی گئی ہے۔
ادھو ٹھاکرے نے کہا کہ طوفان سے متاثرہ ایک بھی فرد کو کُھلے آسمان کے نیچے رہنے نہیں دیں گے جن کا نقصان ہوا ہے انہیں مہا وکاس آگھاڑی حکومت بھرپور مدد کرے گی۔
