ریاست مہاراشٹر کے ضلع اورنگ آباد میں ایم آئی ایم نے مراٹھواڑہ مکتی سنگرام کی تقریب میں حصہ لینے پہنچے ریاست کے وزیراعلی ادھو ٹھاکرے کا ہاتھوں میں پلے کارڈ اور پھولوں کی بارش کرکے خیرمقدم کیا۔حالانکہ ایم آئی ایم کے خیر مقدم کرنے کا یہ طریقہ وزیراعلی کو پسند نہیں آیا اور انہوں نے تقریب کے دوران ایم آئی کی جم کر تنقید کی۔
ضلع میں سخت حفاظتی انتظامات میں مراٹھواڑہ مکتی سنگرام تقریب کا انعقاد کیا گیا۔اس دوران وزیراعلی نے متعدد ترقیاتی اسکیموں کا اعلان کیا۔
اس موقع پر وزیراعلی ادھو ٹھاکرے نے کہا کہ کچھ لوگوں کو ایسا محسوس ہوتا ہے کہ یہاں ترقیاتی کام اچھے ہوئے ہیں، اس لیے پھولوں کی بارش کی جارہی ہے اور اسقبال کے پلے کارڈ دکھائے جارہے ہیں۔جو لوگ مبارکباد پیش کر رہے ہیں میں انہیں کہنا چاہتا ہوں کہ ابھی ہماری حکومت نے یہاں ترقیاتی کام کیے نہیں ہیں اگر یہ آپ کو ترقی نظر آرہی ہے تو ایسی ترقی آپ کو مبارک۔ہم یہاں ترقیاتی کام اب شروع کرنے والے ہیں۔
وہیں وزیراعلی کے اس بیان کے بعد ایم آئی ایم رکن پارلیمان امتیاز جلیل نے کہا کہ ایم آئی ایم نے پھولوں کی بارش کر ریاست کے وزیراعلی کا خیر مقدم کیا ہے۔لیکن ہمیں اور ان سب کو معلوم تھا کہ یہ حکومت پر ایک طریقہ کا طنز ہے، انہیں خود یہ بات معلوم تھی اس لیے ان کی جانب سے کوئی ردعمل ظاہر نہیں کیا گیا کیونکہ انہیں بخوبی اس بات کا علم ہے کہ انہوں نے یہاں پر کوئی ترقیاتی کام نہیں کیے ہیں۔
انہوں نے مزید کہا کہ ایم آئی ایم ریاست کے وزیر اعلی کو مراٹھواڑہ کی حقیقی صورتحال سے واقف کروانا چاہتی تھی جس میں انھیں کامیابی حاصل ہوئی ہے۔
