ریاست مہاراشٹر کے ضلع اورنگ آباد میں عالمی وبا کورونا وائرس کے پیش نظر لیے جانے والے فیصلے کو کلکٹر سنیل چوہان نے منسوخ کرنے کا اعلان کیا ہے۔
واضح رہے کہ عوامی سطح پر سخت مخالفت اور لوگوں کو بھکمری سے بچانے کے لئے لاک ڈاؤن منسوخ کیا گیا ہے۔
بتایا جارہا تھا کہ اکتیس مارچ سے نو اپریل تک ضلع اورنگ آباد میں لاک ڈاؤن نافذ کیا جانا تھا لیکن اب اسے منسوخ کر دیا گیا ہے۔
کلکٹر سنیل چوہان کی جانب سے کیے جانے والے لاک ڈاؤن کی منسوخی کے اعلان سے عوام نے خوشی و مسرت کا اظہار کیا ہے۔
لاک ڈاؤن کے منسوخ کیے جانے کے بعد اکتیس مارچ کو آل انڈیا مجلس اتحادالمسلمین (اے آئی ایم آئی ایم) کی جانب کی جانے والی ریلی اب منسوخ کردی گئی ہے۔
اورنگ آباد سے رکن پارلیمان امتیاز جلیل نے عوامی حمایت کا خیر مقدم کیا اور لاک ڈاؤن کی منسوخی کو عوامی اتحاد کی کامیابی سے تعبیر کیا۔
رکن پارلیمان امتیاز جلیل نے کہا کہ سرکاری ہسپتالز میں خالی اسامیوں پر رابطہ وزیر دیسائی نے یقین دہانی کرائی ہے کہ خالی اسامیوں کو جلد از جلد پر کیا جائے گا۔
وہیں دوسری جانب مہاراشٹر کے کابینی وزیر اسلم شیخ نے کہا تھا کہ لاک ڈاؤن کا فیصلہ عوام کے ہاتھ میں ہے۔ اگر عوام کورونا گائیڈ لائنز پر عمل کرتی ہیں تو لاک ڈاؤن کی ضرورت نہیں پڑے گی۔
واضح رہے کہ اورنگ آباد ضلع میں کورونا وبا پر قابو پانے کے لیے ضلع انتظامیہ نے اکتیس مارچ سے مکمل لاک ڈاؤن نافذ کرنے کا فیصلہ کیا تھا جسے اب منسوخ کردیا گیا ہے۔
