بزرگان دین کے مہاراشٹر کے خلد آباد شہر میں طلبا وطالبات اور خواتین کے لیے کمپیوٹر انسٹی ٹیوٹ اور ٹیلرنگ انسٹی ٹیوٹ کا قیام عمل میں آیا ہے۔ حضرت برہان الدین غریب درگاہ کے احاطے میں قائم ان اداروں میں طلبا و طالبات کو مفت میں جدید و تیکنیکی تعلیم فراہم کی جائے گی۔
جاوید نرگس گروپ اور درگاہ کمیٹی کے اشتراک سے ان اداروں کا قیام عمل میں آیا ہے، جاوید نرگس گروپ کے ذمہ داروں کا کہنا ہے کہ دیہی علاقوں کے بچوں کو جدید تعلیم سے آراستہ کرنا اور انھیں مسابقتی دوڑ میں شامل کرنا ان کا مقصد ہے۔
سماجی کارکن سید طیب ظفر نے کہا کہ اس کمپیوٹر انسٹی ٹیوٹ اور ٹیلرنگ انسٹی ٹیوٹ کا مقصد صرف اور صرف سکھانا ہے جہاں ہر مذاہب کے طلبہ و طالبات کو مفت تعلیم دی جائے گی۔
مزید پڑھیں:اورنگ آباد: مگری کیڑے نے موسمبی کی فصلوں کو تباہ کردیا
جاوید نرگس گروپ کے صدر محمد جاوید کا کہنا ہے کہ خلد آباد میں اس طرح کے انسٹی ٹیوٹ کھولنے کا مقصد یہاں کے بچوں کو تعلیم سے آراستہ کرنا ہے۔ ہماری تنظیم صرف شہروں میں ہی نہیں بلکہ دیہی علاقوں میں اس طرح کے فلاحی کام کو انجام دینے کی کوشش کرتی آرہی ہے۔
اس موقع پر درگاہ کمیٹی کے ذمہ داران اور خلدآباد شہر کی نامور شخصیات کثیر تعداد میں موجود رہے۔
