ریاست مہاراشٹرا کے شہر مالیگاؤں میں کارپوریشن انتخابات کو مدنظر رکھتے ہوئے انڈین یونین مسلم لیگ کی جانب سے نمائندگی کے لیے مہاراشٹر کے اہم ذمہ داران بروز اتوار 31 اکتوبر 2021 کو شہر کا دورہ کریں گے۔
اس وفد میں ریاست مہاراشٹر کے صدر اسلم خان ملا (ناگپور)، نائب صدر عمران علی قریشی (ناگپور)، نائب صدر ایم اے خالد (ممبئی)، جنرل سیکرٹری عبدالرحمن سی ایچ (ممبئی)، خازن کے پی عبدالغفار (ممبئی) اور دیگر اراکین شامل ہیں۔
مہاراشٹر میں مسلم لیگ کارپوریشن انتخابات کے لیے متحرک ہے اور مختلف اضلاع میں کمیٹیوں کی تشکیل نو کا سلسلہ جاری ہے۔
مالیگاؤں دورہ کے دوران مسلم لیگ کی جانب سے اردو میڈیا سینٹر پر دوپہر میں پریس کانفرنس کے زریعے مقامی کمیٹی کے عہدیداروں کے نام کا اعلان کیا جائے گا اور نئے ممبران کا استقبال بھی کیا جائے گا۔
یہ بھی پڑھیں: مرادآباد: صدرِ جمہوریہ کے نام انڈین یونین مسلم لیگ کا میمورنڈم
مالیگاؤں کے مسائل اور مقامی سیاست پر تبادلہ خیال بھی کیا جائے گا۔ اس طرح سے مسلم لیگ کی مقامی آفس کا افتتاح محمد علی روڈ پر شام کے وقت کیا جائے گا۔
بعد ازاں رات میں عشاء بعد عبداللہ نگر کوالیٹی بیکری پر ایک مشاورتی میٹنگ منعقد کی جائے گی۔ یہ معلومات مالیگاؤں ڈیولپمنٹ فرنٹ کی جانب سے دی گئی ہے۔
