ممبئی اور مضافات میں موسلادھار بارش کا زور جاری

گذشتہ جمعہ سے جاری موسلادھار بارش کے سبب ممبئی، تھانے، ممبرا، بھیونڈی،کلیان، امبرناتھ، بدلاپور، پالگھر اور میرا روڈ کی سڑکیں بارش کے پانی میں ڈوب گئی ہیں۔

محکمۂ موسمیات نے اس سلسلے میں پہلے ہی ریڈ الرٹ جاری کر دیا تھا۔

مذکورہ شہروں کے نشیبی علاقوں میں بارش کا پانی داخل ہونے کے سبب لاکھوں کی املاک تباہ و برباد ہونے کی اطلاع ہے۔

مہاراشٹر کے مسلم اکثریتی شہر c کی سڑکیں زیرِ آب ہیں اور نشیبی علاقے پانی میں ڈوبے ہوئے ہیں۔ تھانے ضلعے کی ندیاں خطرے کے نشان سے اوپر بہہ رہی ہیں۔

موسلادھار بارش کے سبب باروی ڈیم اور دھرنا ڈیم کے دروازوں کو کھول دیا گیا ہے جس کے سبب اطراف کے گاؤں کھنڈولی، جو گاؤں، پور گاؤں اور واندرے گاؤں کی حالت خراب ہو گئی ہے۔

مقامی لوگوں کے مطابق لوگ جان بچانے کے لیے عمارت کی چھتوں کا سہارا لینے پر مجبور ہیں جس کے بعد ضلع انتظامیہ نے راحت رسانی کا کام شروع کیا ہے مگر اس آپریشن کے دوران پیش آنے والی دشواری کے سبب ہیلی کاپٹر کے ذریعے پھنسے ہوئے لوگوں کو بحفاظت دوسرے مقامات پر منتقل کیا گیا ہے۔

تھانے سے متصل علاقے ڈومبیولی میں واقع ہائی پروفائل ہاؤسنگ سوسائٹی پلاوا میں کئی فٹ پانی جمع ہوجانے کے سبب کاریں پانی میں تیرتی نظر آرہی تھیں۔

فی الحال پولیس اور مقامی انتظامیہ کے افسران سیلاب ذدہ علاقوں کا دورہ کر رہے ہیں۔