ریاست مہاراشٹر کے شہر مالیگاؤں میں ممبئی سے غیر قانونی طریقے سے پلاسٹک لانے والے دو ٹرکوں کو پولیس نے حراست میں لے لیا ہے اور دونوں گاڑیوں کے ڈرائیوروں پر سنگین دفعات کے تحت مقدمہ کا اندراج کرلیا گیا ہے۔
اس تعلق سے مالیگاؤں سٹی پولیس اسٹیشن کے انچارج پی آئی مہاجن نے نمائندے ای ٹی وی بھارت کو بتایا کہ آج صبح کے وقت شہر کے داخلی راستوں پر ناکہ بندی کے دوران شہر میں ممبئی سے غیر قانونی طریقے سے پلاسٹک لانے والے دو ٹرکوں کو پولیس نے حراست میں لے لیا ہے۔ اور دونوں گاڑیوں کے ڈرائیوروں پر سنگین دفعات کے تحت مقدمہ کا اندراج کرلیا گیا ہے۔
پی آئی مہاجن نے بتایا کہ ان گاڑیوں میں بھرے پلاسٹک کے نمونے کو وہ مہاراشٹر پولیوشن کنٹرول بورڈ کو بھیجنے کے بعد آگے کی کاروائی کریں گے۔انہوں نے بتایا کہ یہ کارروائی ضلع ایس پی سچن پاٹل، ایڈیشنل ایس پی چندر کانت کھانڈوی، ڈی وائے ایس پی لتا دونڈے کی رہنمائی میں انجام دی جارہی ہے۔ واضح رہے کہ اس معاملے میں پولیس مزید تحقیقات کررہی ہے۔
واضح رہے کہ مالیگاؤں میں غیر قانونی طریقے سے چلائی جارہی دو سو سے زائد پلاسٹک کارخانوں کے خلاف نیشنل گرین ٹریبونل میں ایک معاملہ داخل کیا گیا تھا، جس میں عدالت نے فیصلہ سناتے ہوئے مالیگاؤں ڈیولپمنٹ پلان کو ماحولیاتی آلودگی کو کنٹرول کرنے کا حکم جاری کرتےہوئے پلاسٹک کارخانوں کو سیل کرنے کوکہا تھا۔جس کے بعد ضلع کلکٹر، مالیگاؤں مونسپل کارپوریشن اور دیگر محکموں نے ان پلاسٹک کارخانوں کو سیل کرنا کا کام شروع کردیا گیا تھا۔
