اردو کے عالمی شہرت یافتہ شاعر فیض احمد فیض کی شاعری کو انگریزی میں متعارف کرواکر پروفیسر ظہیر علی نے ادبی دنیا پر احسان عظیم کیا ہے۔
ان خیالات کا اظہار ڈاکٹر ارتکاز افضل نے کیا، وہ کریسینٹ ایجوکیشن اینڈ ویلفیئر کی جانب سے منعقد تقریب سے خطاب کررہے تھے اس پروگرام میں دو کتابوں کا اجرا عمل میں آیا۔
اس تقریب میں 'رومانسنگ ود ریوولوشن لائف آف فیض احمد فیض' کتاب کا اجرا ہوا جو اردو کے عالمی شہرت یافتہ شاعر فیض احمد فیض کی شاعری کا انگریزی ورژن ہے۔
تقریب اجرا میں نامور ادبا، دانشور اور ریسرچ اسکالر موجود تھے۔
پروفیسر ظہیر علی کی کتاب پر تبصرہ کرتے ہوئے ڈاکٹر ارتکاز افضل نے اسے ایک عظیم کارنامے سے تعبیر کیا، ساتھ ہی فیض احمد فیض کے ادبی سفر پر بھی روشنی ڈالی۔
معروف شاعر خان شمیم خان نے فیض احمد فیض کو منظوم خراج عقیدت پیش کیا۔
اس تقریب کی صدارت مہاراشٹر کالج، ممبئی کے پرنسپل شکیل محمود ہرزک نے کی۔
اس تقریب میں ماہرین ادب نے معروف ادبی شخصیات اور ان کی خدمات پر اپنے اپنے زاویے سے روشنی ڈال کر سامعین کی معلومات میں اضافہ کیا۔
کریسینٹ سوسائٹی کے صدر خان مقیم خان پروگرام کے اغراض ومقاصد پیش کیے جبکہ یوسف دیوان نے پروگرام کی نظامت انجام دی اسی طرح سہیل ذکی الدین کے اظہار تشکر کے بعد پروگرام اختتام پذیر ہوا۔
