ممبئی میں موجود نجی اور سرکاری قبرستان کی تزئین کاری کے لیے محکمہ بی ایم سی جلد ہی فنڈ جاری کرے گا۔ یہ بات سماجوادی پارٹی کے رکن اسمبلی رئیس شیخ نے کہی ہے۔ اُنہوں نے قبرستان کے ٹرسٹی اور ذمہ داروں سے اس بات کی اپیل کی ہے کہ وہ قبرستان میں ہونے والی خامیوں اور ضرورتوں سے متعلق مقامی بی ایم سی وارڈ میں بتائیں جس کے بعد ہر قبرستان کی تزئین کاری کے لیے ٹینڈر کے ذریعے رقم جاری کی جائے گی۔ Mumbai Graveyards Issue
رئیس شیخ نے کہا کہ ممبئی شہر اور مضافات کے مسلم اکثریتی علاقوں میں قبرستان کے مسائل اور اس کی خستہ حالی کا معاملہ بار بار سماج وادی پارٹی نے ممبئی میونسپل کارپوریشن میں اٹھایا ہے اور ان مسائل کو حل کرنے کے لیے مسلسل جدوجہد کی جس کی وجہ سے ممبئی میونسپل کارپوریشن کی جانب سے قبرستانوں کی تعمیر و مرمت کام کیا گیا لیکن اس کے باوجود شہر و مضافات میں اب بھی کئی قبرستان خستہ حالی کا شکار ہیں، جن میں نجی قبرستان بھی شامل ہے۔
رکن اسمبلی رئیس شیخ نے کہا کہ اس سلسلے میں ہم نے میونسپل انتظامیہ کے اعلیٰ افسران سے ملاقات کی اور ان مسائل کو حل کرنے پر زور دیا جس کے بعد میونسپل انتظامیہ نے تمام وارڈ کے ایم او ایچ کو قبرستان کا کام کرانے کا حکم جاری کیا ہے۔ انہوں نے کہا کہ شہر و مضافات میں بی ایم سی کے تحت آنے والے قبرستان اور بالخصوص نجی قبرستان کے ٹرسٹیان، ذمہ داران، سوشل ورکرز اور این جی اوز سے گزارش ہے کہ وہ اپنے اپنے وارڈ کے ایم او ایچ سے رابطہ کریں اور ان کے انجینیئر کے ساتھ قبرستانوں کا سروے کرائیں تاکہ مسلم قبرستانوں میں درپیش مسائل کو مشترکہ کوششوں سے حل کیا جا سکے۔
