بھارت کے نائب صدر جمہوریہ وینکیا نائیڈو کے تبصرے کی شدید مذمت کرتے ہوئے نشنلشٹ کانگریس پارٹی خواتین شعبہ اور غیر منظم سیل کے کارکنان نے زبردست احتجاج کیا۔
خواتین شعبے کی صدر سواتی کامبلے کی قیادت میں پارٹی کارکنان نے اشوک نگر ڈانڈیکر واڑی پوسٹ آفس کے سامنے چھترپتی شواجی مہاراج کے بینر کے ساتھ جئے بھوانی جئے شیواجی کا نعرہ بلند کرتے ہوئے نائب صدر جمہوریہ کے خلاف احتجاج کیا۔
کارکنان نے ڈانڈیکر واڑی پوسٹ آفس سے جئے بھوانی اور جئے شیواجی لکھا ہوا دس ہزار پوسٹ کارڈ نائب صدر جمہوریہ وینکیا نائیڈو کے پتہ پر بطور احتجاج روانہ کیا ہے۔
واضح ہوکہ حال ہی میں، راجیہ سبھا کے صدر وینکیا نائیڈو نے مہاراشٹر کے نامزد راجیہ سبھا ممبران سے حلف لینے کے بعد جئے بھوانی اور جے شیواجی مہاراج کا نعرہ لگانے پر ناراضگی کااظہار کرتے ہوئے کہا تھا کہ 'یہ ہمارا ایوان ہے اور ہم اس طرح کے نعرے اپنے ایوان میں لگانے کی اجازت نہیں دے سکتے ہیں'۔ جس کی پورے مہاراشٹر میں زبردست مخالفت جاری ہے۔
