آر ایس ایس کی جانب سے پیش وکیل نے جج آصف شیخ سے درخواست کی کہ اس معاملے میں ایک پٹیشن ممبئی ہائی کورٹ میں داخل ہے اور اس کی سماعت اگست میں ہونی ہے اس لیے انہیں اس معاملے کی سماعت کے لیے آگے کی تاریخ دی جائے جبکہ راہل گاندھی کے وکیل نے عدالت سے درخواست کی کہ ان کے موکل سیاسی مصروفیت کی وجہ سے بھیونڈی کورٹ نہیں پہنچ سکے۔
دونوں فریقین کے ذریعہ اس مقدمہ کی سماعت کے لیے آگے کی تاریخ کے مطالبہ کو دیکھتے ہوئے عدالت نے سماعت ملتوی کر دی۔ اس مقدمہ کی اگلی سماعت 18 اپریل کو ہوگی۔
واضح رہے کہ سنہ 2014 کے پارلیمانی انتخابات کے دوران بھیونڈی کے سونالے میدان میں انتخابی اجلاس میں راہل گاندھی نے مہاتما گاندھی کے قتل کے لیے مبیّنہ طور پر آر ایس ایس کو ذمہ دار ٹھہرایا تھا۔
راہل گاندھی کے اس بیان کو لے کر آر ایس ایس کے بھیونڈی سربراہ راجیش کُنٹے نے عدالت میں ان کے خلاف ہتک عزت کا مقدمہ دائر کیا تھا، جس کی سماعت کے لیے راہل گاندھی 9 مئی سنہ 2015، 30 جنوری سنہ 2017 اور 12 جون سنہ 2018 ان تین تاریخوں پر بھیونڈی کورٹ میں پیش ہوچکے ہیں۔
امید ظاہر کی جارہی ہے کہ وہ اگلی سماعت کے دن بھیونڈی کی مقامی عدالت میں پیش ہوسکتے ہیں۔
