ریاست مہاراشٹر کے مسلم اکثریتی شہر مالیگاؤں کا بامسیف کے قومی رہنما اور معروف سماجی کارکن وامن مشرام نے دورہ کیا اور سیاسی، سماجی، مذہبی اور تعلیمی شخصیات سے ملاقات کی۔ مقامی راشٹریہ مسلم مورچہ کی جانب سے منعقد پریس کانفرس میں ان کا استقبال کیا گیا۔
اس پریس کانفرنس میں وامن مشرام نے کہا کہ 'ہمیں این پی آر کا پوری طاقت کے ساتھ بائیکاٹ کرنا چاہیے۔' انہوں نے کہا کہ 'بی جے پی حکومت آر ایس ایس کے ایجنڈے پر چلتی ہے اور سی اے اے قانون سے جاتی واد کو فروغ ملے گا۔'
انہوں نے کہا کہ 'دیکھا جا رہا ہے کہ جہاں کہیں بھی احتجاج ہو رہے ہیں انہیں رکوانے کے لیے حکومت سسٹم کا سہارا لے رہی ہے۔ آج موجودہ حکومت کو ڈر ہے کہ کہیں ان کے منصوبوں پر پانی نہ پھر جائے اور ہندو راشٹر بنانے کا خواب پورا نہ ہو پائے اسی لیے طرح طرح کے حربے اپنا رہی ہے۔'
اس موقع پر راشٹر مسلم مورچہ کے قومی صدر مولانا عبدالحمید ازہری نے بھی اپنے خیالات کا اظہار کیا۔ کل جماعتی تنظیم کی جانب سے صوفی غلام رسول قادری نے بھارت بند کی حمایت کا اعلان بھی کیا۔ اس پریس کانفرنس میں حاجی حنیف صابر، حاجی یوسف الیاس، محمد مستقیم ڈگنیٹی، فیروز اعظمی اور دیگر شہر کی معروف شخصیات نے شرکت کی۔
