بالی وڈ کی معروف اداکارہ اور کوئین کے نام سے مشہور کنگنا رناؤت، سوشانت سنگھ راجپوت کی موت کے بعد سے ہی سرخیوں میں ہیں۔
کنگنا رناؤت مسلسل ٹوئٹ کے ذریعہ شیوسینا اور بالی ووڈ سٹارز پر شدید نکتہ چینی کی ہے، لیکن اب کنگنا نے منشیات کے معاملے میں متعدد ٹوئٹز کے ذریعے اشاروں اشاروں میں ہی معروف اداکارہ دیپیکا پادوکون کو نشانہ بنایا ہے۔
ممبئی آفس پر بی ایم سی کی کارروائی کے بعد کنگنا رناؤت اور شیوسینا کے مابین زبانی جنگ بدستور جاری ہے۔
ان دنوں کنگنا رناؤت کے نشانے پر بالی وڈ کے بہت سارے ستارے ہیں، لیکن اس بار کنگنا نے دیپیکا پادوکون کو منشیات کے حوالے سے نشانہ بنایا ہے۔
کنگنا رناؤت نے دیپیکا پر طنزیہ انداز میں ٹوئٹ کیا کہ 'ریپیٹ آفٹر می ڈپریشن' منشیات کے استعمال کا نتیجہ ہے'۔
انہوں نے مزید لکھا کہ 'نام نہاد اعلیٰ معاشرے کے بڑے سٹارز کے بچے جو اچھی پرورش کا دعویٰ کرتے ہیں اور اپنے منیجر سے پوچھتے ہیں مال ہے کیا'۔
اسی دوران کنگنا نے ایک اور ٹوئٹ میں لکھا کہ 'ہمارے ملک اور ہمسایہ ممالک کے ذاتی مفادات کے ذریعے ہماری جونوان آبادی کو برباد کرنے کے ساتھ ساتھ ان نوجوانوں کے مستقبل کو برباد کیا جارہا ہے۔
انہوں نے کہا کہ 'نارکوٹیزم (منشیات فروشی) سب سے بڑا چیلنج ہے، اس لیے کیا ہم اس پر غور کرنے کے لیے تیار ہیں'۔
خیال رہے کہ سوشانت سنگھ راجپوت موت کیس میں منشیات کے زاویے کی تحقیقات کرنے والے نارکوٹکس کنٹرول بیورو کی انکوائری میں ہر روز نئے انکشافات ہو رہے ہیں۔
واضح رہے کہ تلنگانہ بی جے پی یونٹ نے کہا ہے کہ سماج وادی پارٹی کی رکن جیہ بچن نے منشیات کی لعنت کے معاملہ میں پارلیمنٹ کے ایوان بالا میں غیر ذمہ داری کا اظہار کیا ہے۔
بی جے پی کے ریاستی ترجمان کے کرشنا ساگر راو نے کہا کہ جیہ بچن نے منشیات کی لعنت کی مذمت نہیں کی جس نے بھارت بھر کے نوجوانوں بشمول ان کی خود کی فلم انڈسٹری میں نوجوان اداکار اور اداکاروں کی زندگیاں برباد کی ہیں۔
انہوں نے کہا کہ جیہ بچن نے منشیات پر انحصار، اس کی عادت اور نوجوان بالی ووڈ، ٹالی ووڈ، کنڑفلم اداکاروں کی جانب سے اس کے استعمال کی مذمت نہیں کی ہے جن کے نام حال ہی میں این سی پی نے جاری کیے ہیں اور یہاں تک کہ بعض کو گرفتار بھی کیا گیا ہے۔
انہوں نے بی جے پی کے رکن پارلیمان روی کشن کے بیان کا حوالا دیتے ہوئے یہ تبصرہ کیا۔ اب کنگنا رناؤت بھی اس بیان بازی میں شامل ہوگئی ہیں۔
کنگنا رناوت نے بالی ووڈ میں منشیات کے معاملے پر ٹوئٹ کرتے ہوئے لکھا کہ 'جیا جی، اگر میری جگہ پر آپ کی بیٹی شویتا ہوتیں، جنہیں نوعمری میں پیٹا گیا ہوتا، نشہ اور چھیڑ چھاڑ کا شکار ہوتیں، تب بھی کیا آپ ایسا ہی کہتیں'۔
کنگنا نے کہا کہ اگر ابھیشیک نے بدمعاشی اور ہراساں کرنے کی شکایت کی ہوتی اور ایک دن پھانسی پر لٹکے ملتے تب بھی کیا آپ ایسا ہی بولتیں۔؟
کنگنا نے جیا بچن سے اپیل کی کہ وہ بھی ہمارے ساتھ ہمدردی کا مظاہرہ کریں۔
واضح رہے کہ اس سے قبل راجیہ سبھا میں آج پارلیمنٹ کے مانسون اجلاس کے دوسرے دن، جیا بچن نے منشیات کے استعمال سے متعلق روی کشن کے بیان پر ردعمل کا اظہار کیا تھا۔ اداکارہ جیا بچن نے بغیر نام لیے ہی بی جے پی ممبر اور فلم اداکار روی کشن کو نصیحت دے ڈالی۔
