مدھیہ پردیش:آبشار میں چھ افراد غرقاب، چار کی موت

مدھیہ پردیش کے ضلع ریوا کے گڑھ تھانہ حلقے کے کیوٹی آبشار (جھرنا) میں غرقاب نصف درجن نوجوانوں میں سے چار کی لاش آج صبح برآمد کر لی گئی جبکہ دو کی تلاش جاری ہے۔ یہ سبھی اترپردیش کے ضلع پریاگ راج کے باشندے ہیں جو یہاں جھرنے کے پاس پکنک منانے کے لیے آئے ہوئے ہیں۔

پولیس ذرائع کے مطابق گذشتہ روز اترپردیش کے ضلع پریاگ راج سے پکنک منانے کچھ افراد ضلع ریوا کے کیوٹی آبشار میں آئے تھے، جہاں نہاتے وقت شام کو چھ افراد ڈوب گئے۔ حادثے کی اطلاع کے بعد پولیس موقع پر پہنچ گئی اور غوطہ خوروں کی مدد سے انھیں ڈھوندنا شروع کیا لیکن اندھیرا ہونے کی وجہ سے لاش مل نہ سکی۔ آج صبح ایک بار پرتلاش کی گئی جن میں چار کی لاش برآمد کر لی گئی ہے۔

پولیس نے بتایا کہ اب تک ابھیشیک سنگھ (19)، راہل (30)، یش کیشروانی (17) اور پرانجُل کیشروانی (18) کی لاش برآمد کی گئی ہیں جبکہ دو دیگر آکاش کیشروانی اور گولو پاسی کی تلاش جاری ہے۔ وہیں ہلاک ہونے والوں کے اہل خانہ بھی موقع پر پہنچ گئے۔ پولیس نے لاشوں کو پوسٹ مارٹم کے لیے بھیج دیا ہے۔