اندور میں ہجومی تشدد معاملے میں دو ملزم گرفتار

اندور میں ہوئے ہجومی تشدد کے معاملے میں پولیس نے دو ملزمین کو گرفتار کرلیا ہے جب کہ تیسرا ابھی بھی فرار ہے جس کی تلاش جاری ہے۔

مدھیہ پردیش کی اندور پولیس نے اندور میں ہوئے ہجومی تشدد کے معاملے میں دو ملزمین کو گرفتار کرلیا ہے جب کہ تیسرے کی تلاش جاری ہے۔ جانکاری کے مطابق اترپردیش کے ہردوئی ضلع کا رہائشی تسلیم، اندور کے گووند نگر کالونی، بال گنگا علاقے میں چوڑی فروخت کرنے پہنچا تھا، جہاں وہ ہجومی تشدد کا شکار ہوگیا۔

اس معاملے میں تسلیم کی جانب سے اندور تھانہ میں نامعلوم شرپسندوں کے خلاف معاملہ درج کرایا گیا تھا، تاہم شرپسندوں کی جانب سے کیے گئے تشدد کی وائرل ویڈیو کے بنیاد پر پولیس نے کارروائی کرتے ہوئے دو ملزمین کو گرفتار کرلیا ہے اور تیسرے کی تلاش کررہی ہے، گرفتار ملزمین کی شناخت راکیش پوار، راج کمار بھٹناگر کے طور پر ہوئی ہے جب کہ ویویک ویاس ابھی بھی فرار ہے۔

پولیس نے گرفتار ملزمین کے خلاف 14 سخت دفعات کے تحت معاملہ درج کرکے کارروائی شروع کردی ہے۔