بھوپال: وزیر اعظم نریندر مودی راجدھانی بھوپال سے دو وندے بھارت ٹرینوں کو ہری جھنڈی دکھائیں گے اور مدھیہ پردیش میں اپنے یک روزہ قیام کے دوران کل بھارتیہ جنتا پارٹی کے بوتھ کارکنوں سے بات چیت کریں گے۔ سرکاری اطلاع کے مطابق، وزیر اعظم مودی شہڈول ضلع میں بھی مختلف پروگرامز میں بھی شرکت کریں گے۔ ویرانگنا رانی درگاوتی گورو یاترا کا اختتام شہڈول میں ہوگا اور رانی درگاوتی کا 'بلیدان دیوس' منایا جائے گا۔ وزیر اعظم مودی شہڈول میں قومی سطح پر سکیل سیل انیمیا کے خاتمے اور پی وی سی آیوشمان کارڈ کی تقسیم کا افتتاح بھی کریں گے۔ اس سے پہلے وہ بھوپال کے رانی کملا پتی ریلوے اسٹیشن پر دو وندے بھارت ٹرینوں، بھوپال-اندور اور بھوپال-جبل پور کو ہری جھنڈی دکھائیں گے۔
قبل ازیں وزیر اعلیٰ شیوراج سنگھ چوہان نے ریلوے حکام کو ہدایت دی کہ ایسے انتظامات کیے جائیں تاکہ ریاست کے شہری ریلوے اسٹیشن پر ہونے والے پروگرام میں وزیر اعظم کا خطاب سن سکیں۔ وزیر اعظم مودی شہڈول میں قومی سطح پر سکیل سیل انیمیا کے خاتمے کے مشن 2047 کا بھی افتتاح کریں گے۔ مرکزی حکومت کی وزارت صحت، قبائلی امور، آیوش اور ملک کی 17 ریاستوں کے نمائندے آن لائن پروگرام میں حصہ لیں گے۔ وزیر اعظم شہڈول میں پی وی سی آیوشمان کارڈ کی تقسیم سے متعلق اسکیم کا افتتاح کریں گے۔ ملک میں پہلی بار ریاست میں 3 کروڑ 57 لاکھ آیوشمان مستفیدین کو ڈیجیٹل آیوشمان کارڈ تقسیم کیے جا رہے ہیں۔
یہ بھی پڑھیں: Vande Bharat Express آسام کو ملی پہلی وندے بھارت ایکسپریس، پی ایم مودی نے جھنڈی دکھا کر کیا روانہ
یو این آئی
